ବିଶ୍ୱ କବିତା ଦିବସ ଉପଲକ୍ଷେ

ମାର୍ଚ୍ଚ ମାସ ଏକୋଇଶି ତାରିଖଟି

    ବିଶ୍ୱ କବିତା ଦିବସ

ଆସ ମୋର କବି, ଭାଇ ଓ ଭଉଣୀ

    ପାଳିବା ହୋଇ ହରଷ ।

ଆମରି ସୃଷ୍ଟିକି ଉଜ୍ଜୀବିତ କରି

   ମନରେ ଲଭିବା ଶାନ୍ତି

ଦିନେ ନା ଦିନେ ତ ଚାଲିଯିବା ଆମେ

    ରହିଥିବ ଆମ କୃତି ।

ଭାଷାର ବିକାଶ ପଥରେ ନିଜର

   ମନ ପ୍ରାଣ ଢାଳିଦେବା

ସମାଜର ଉନ୍ନତିରେ ବ୍ରତୀ ହୋଇ 

   ଯଶ, କୀର୍ତ୍ତି ରଖିଯିବା ।

ପୂର୍ବରୁ ଆମର ଭାଷାପାଇଁ କେତେ

    କବି ଓ ବିଦ୍ୱାନ ଥିଲେ

ତାଙ୍କରି ପାଇଁକି ଆମେମାନେ ଆଜି

   ଲେଖା ପଢାକୁ ଶିଖିଲେ ।

ସେହିପରି ଆମ ଉତ୍ତର ଦାୟାଦ

   ଆମକୁ ଅନୁସରଣ

କରିବେ ନିଶ୍ଚୟ ମନେ ଆଶା ରଖି

   କରିବା ସୃଷ୍ଟି ମହାନ ।

କବି କଲମରେ ଯାଦୁ ରହିଅଛି

   ଅସାଧ୍ୟ କରେ ସାଧନ

ଅସି ଠାରୁ ମସି ଅଟେ ମଜଭୂତ

   ରହିଛି ବହୁ ପ୍ରମାଣ ।

 ବୀର କିଶୋରଙ୍କ କବିତାର ବହ୍ନି

    ଇଂରେଜକୁ ଦେଲା ତଡି

କୁନ୍ତଳା କୁମାରୀ ସାବତଙ୍କ ଲେଖା

    ଜାଗ୍ରତର ତରବାରୀ ।

ଫକୀର ମୋହନ, ଗୋପାଳ ଚନ୍ଦ୍ର ଓ 

    ହରେ କୃଷ୍ଣ ମହତାବ

ଏହିପରି ବହୁ ବରେଣ୍ୟ ସାଧକ

    କରିଥିଲେ ସ୍ୱାର୍ଥ ତ୍ୟାଗ ।

ତାଙ୍କପରି ତେଜୋଦୀପ୍ତ ନ ହେଲେ ବି

   ଖଦ୍ୟୋତ ପରିକା ହୋଇ 

କିଛି ଯଦି ନିଜ ଜ୍ଞାନ ଆଲୋକରେ

   ଆଲୋକ ପାରିଲେ ଦେଇ ।

ଜୀବନ ଆମର ହୋଇଯିବ ଧନ୍ୟ

     ସମାଜ କଲ୍ୟାଣ କରି

କବିତା ଦିବସେ ଆସନ୍ତୁ ସମସ୍ତେ

  ରଚିବା ସୃଷ୍ଟି ଆମରି ।