ବିକଳାଙ୍ଗ ବର୍ଣ୍ଣବିଭା

ବସୁନ୍ଧରା ଏବେ ଋତୁମତୀ ନୁହେଁ

ବାର୍ଦ୍ଧକ୍ୟ ଆସୁଛି ମାଡ଼ି

ପ୍ରୀତିଲଗ୍ନାର ପହିଲି ପରଶେ

ଯୌବନ ଗଲାଣି ଛାଡ଼ି l

ରୁକ୍ଷ ଲାଗୁଛି ଦିନୁ ଦିନ ଯା'ର

ତନୁ ତନିମାର ଛବି

ବିଷାକ୍ତ ବଳୟ କରେ ଆଲିଙ୍ଗନ

ନିତ୍ୟ ନିଦାଘରେ ଦ୍ରବି l

ଜୀବନ ଜୀବିକା ବେସୁରା ହେଲାଣି

ଆକଣ୍ଠ ସୁରାର ସେଵା

ସମାଜ ସଂସ୍କୃତି ସକଳ ସୋପାନେ

ବିକଳାଙ୍ଗ ବର୍ଣ୍ଣବିଭା l

ସ୍ୱାଧୀନତା ସତେ ସମାଧି ଲଭିଛି

ସଇତାନି ସ୍ୱାର୍ଥ ବଳେ

ଗଣତନ୍ତ୍ରର ଗଣିତ ଭୂଗୋଳ

ବଦଳିଛି କଉଶଳେ l

ପ୍ରତି ପଦେ ପଦେ ଛଦ୍ମ ଛାୟାର

ଚାରୁ ଚିତ୍ରିତ ଆଭା

ଦେବତା ବି ଆଜି ଦାସତ୍ବ ବନ୍ଧନେ

ଦେବାଳୟେ ପାଏ ଶୋଭା l

ମୃତ୍ୟୁ ରଚୁଛି ମହା ତାଣ୍ଡବ

ହିଂସ୍ରତାର କରବାଳେ

ଘରେ ବା ବାହାରେ ଯୁଦ୍ଧ ଭୂମିରେ 

ଲେଲିହାନ ଶିଖା ତୋଳେ l

ମହମହ ଆଉ ବାସୁନି ମଳୟେ

ନବ ମଲ୍ଲିକାର ବାସ

ଯୂଇ,ଯାଇ,ହେନା,ଚମ୍ପା ଓ ଚମେଲୀ

ଭୁଲି ଲେଣି ଚାରୁ ହାସ l

ପ୍ରକୃତିରାଣୀର ପରିସଂଖ୍ୟାନରେ

ଜର୍ଜରିତ ଜୀବଜନ୍ତୁ

ଜରାଗ୍ରସ୍ତ ଆଜି ଜଙ୍ଗଲ ବିଭବ

ଅକାଳେ ଲଭନ୍ତି ମୃତ୍ୟୁ l

ଗର୍ବେ ଗରୀୟାନ ଏ ଜାତି ମହାନ

ବିଶ୍ୱ ବାତାୟନ ପାଶେ

ସମୟ ସାଥୀରେ ସଂକଳ୍ପ ନେବାରେ

ସୁସ୍ଥ ପରିବେଶ ଆଶେ l