ବୀମା ଏଜେଣ୍ଟ

ସିଧାକଥା-୧୭

ବୀମା କମ୍ପାନୀର ଏଜେଣ୍ଟ ଜାଲରେ ପଡ଼ିବାକୁ ଭାରି ଡର ,

ମନ୍ତ୍ର ଜାଣନ୍ତି ସେ କେଡ଼େ କଉଶଳେ କରିନେବେ ଆପଣାର । 

କହିବେ ସେମାନେ ତୁମପାଇଁ ଆମେ, ସେବାର ସୁଯୋଗ ଦିଅ,

ବିପଦେ ଆପଦେ ଆମେ ଠିଆ ହେବୁ ପଲିସଟା କରିନିଅ ।

କମିଶନ ଯାହା ମିଳିବ ଆମକୁ ସବୁ ମୁଁ ତୁମକୁ ଦେବି,

କେବଳ ଆମର ଚାକିରି ପାଇଁ ମୁଁ ପଲିସଟା କରିନେବି ।

ବାରବାର ଆସି କବାଟ ବାଡ଼େଇ କେତେ ମିଠାକଥା କହି,

ତ୍ୟାଗର ପ୍ରତୀକ ସେବାନାମ ଧରି ନେଇଯିବେ ମନମୋହି ।

ଅସଲ ବେଳକୁ ଲୁଚିବେ କେଉଁଠି ପାଇବନି ତାଙ୍କୁ ଖୋଜି,

ଆଖିର ଲୁହକୁ ଓଠ ପିଉଥିବ ତାଙ୍କ ନାମ ଭଜିଭଜି ।

ଅଫିସକୁ ଯାଇ ପଚାରି ବୁଝିଲେ କହିବେ ଓଲଟା କଥା ,

ଆଉ ଗୋଟେ ନୂଆ ଯୋଜନା ଆସିଛି ସେଥିରେ ନଥାଏ ଧୋକା ।

ସେଥିରୁ ଗୋଟାଏ ପଲିସ କରନ୍ତୁ ଦୁଃଖ ହେଇଯିବ ଦୂର,

ଯାହା ତ ହେବାର ହେଲାଣି ଛାଡ଼ନ୍ତୁ ଏଠି ଦସ୍ତଖତ କର ।

ଅସହାୟ ହୋଇ ଚାହିଁ ରହିଯିବେ ନଥିବେ ସାହାରା କେହି,

ଯାହା ତ ଯିବାର ଯାଇ ସାରିଲାଣି ଫେରିବେ ବିକଳ ହୋଇ ।