ବୀଜମନ୍ତ୍ର

ଭାବେ ନିଅନ୍ତି କରଜ 

ଟିକେ ଲାଜ

ଝିଅ ବୋହୁଙ୍କଠୁ 

ଲାଗିବନି ଜମା ଅସହଜ 

ଯେମିତି ଓଢଣା ତଳର ସଣ୍ଠଣା 

ହେବାକୁ ସହଜ 

      ଭାବେ ଦିଅନ୍ତି କରଜ 

     ଯୋଗ ରୋଜ ରୋଜ 

    ସୁସ୍ଥ ରହିବା ହୁଅନ୍ତା ସହଜ 

    ଶରୀର ଓ ମନ 

     ଏକ ଓ ଅଭିନ୍ନ

    ଲାଗିବନି ଟିକେ ବି ଅବସନ୍ନ 

     ଜୀବନ ଲାଗିବନି ଜମା ଅସହଜ 

ଭାବେ ନିଅନ୍ତି ଓ ଦିଅନ୍ତି କରଜ 

ସମ୍ପର୍କର ସୂତାରେ ଛନ୍ଦି 

ମଙ୍ଗଳ ସୂତ୍ର ନିଅନ୍ତି ପିନ୍ଧି 

ରାକ୍ଷୀ ଦିଅନ୍ତି ବାନ୍ଧି 

ପରିବାରକୁ ସୁଦୃଢ ରଜ୍ଜୁରେ ଛନ୍ଦି 

ପୋଛି ଦିଅନ୍ତି ଅଳନ୍ଧୁ ଅନ୍ଧିସନ୍ଧି 

ସ୍ତ୍ରୀ ବା ପୁରୁଷଟିଏର ପ୍ରଚ୍ଛନ୍ନ ମନରେ 

ସ୍ନେହ ପ୍ରେମ ପ୍ରୀତି ମୈତ୍ରୀର ଭାବ ହୁଅନ୍ତା ସହଜ 

ରୋଜ ରୋଜ ଲାଗନ୍ତାନି ବୋଝ 

ଜୀବନଟା ଲାଜ ଓ ଯୋଗର ଦୁଇ ବୀଜ 

ହୁଏତ ସୃଷ୍ଟିର ବା ସୃଷ୍ଟିରୁ କରଜ l