ବିଦ୍ୟାଳୟ ସାଥୀ

ତେସ୍ତରି ସାଲ ନୂଆ କରି ଆରମ୍ଭିଲି ହାଇସ୍କୁଲ ପାଠ

ଗୋପାଳ ସ୍ମୃତି ବିଦ୍ୟାପୀଠରେ ନାମ ଲେଖି ହେଲି ଚାଟ

ପ୍ରଥମ ବେଂଚଟି ଝିଅ ପିଲାଙ୍କର ଦ୍ୱିତୀୟ ବେଂଚରେ ମୋର

ଆସ୍ଥାନ ବ୍ୟବସ୍ଥା ଶ୍ରେଣୀ ଶିକ୍ଷକଙ୍କ ହେଲା ତହିଁ ବସିବାର

ବିଶ୍ୱନାଥ ଧନଂଜୟ ପ୍ରଶାନ୍ତ ବିଷ୍ଣୁ ସହ ପାଂଚ ମିଶି

ପଂଚ ପରମେଶ୍ଵର ପରି ଅନୁଭବ କଲୁ ସାଥି ମେଳେ ହସି

ଛୋଟ ଖେଳଛୁଟି ଦ୍ୱିତୀୟ ପିରିୟଡ ବଡ ଚତୁର୍ଥ ପରର

ଚାରିଟା ବାଜିଲେ ଘରକୁ ଧାଇଁବା ଛଅ କିମି ବାଟ ଦୂର

ପ୍ରଥମ ହିନ୍ଦି ପିରିୟଡ ଦିନ ଆମ୍ବଟା କି ଲିଂଗ ବୋଲି

ହିନ୍ଦି ଶିକ୍ଷକ ପ୍ରଶ୍ନ ପଚାରିଲେ କ୍ଳୀବ ଲିଂଗ କହିଦେଲି

ଠୋ କିନା ଗୋଟେ ଚଟକଣି ମତେ ଉପହାର ମିଳିଗଲା

ମନେ ଭାବେ ଶିକ୍ଷକଙ୍କ ଜ୍ଞାନ ନାହିଁ ଦଣ୍ଡ କାହିଁକି ମିଳିଲା

ଅନ୍ୟ ସାଥୀମାନେ ହିନ୍ଦି ପଢିଥିଲେ ବୁଝାଇ କହିଲେ ମତେ

କ୍ଳୀବ ଲିଂଗ କିଛି ହିନ୍ଦିରେ ନଥାଏ ପୁଲିଙ୍ଗ ସ୍ତ୍ରୀଲିଙ୍ଗ ଗତେ

ଖେଳଛୁଟି ବେଳେ ପଇସା ଏକାଠି କରି ସାଂଗ ମାନଙ୍କର

ପିଆଜି କି ବୁଟ ଭଜା ଖାଉ ଆମେ ନଥାଏ ଭିନ୍ନ ବିଚାର

ଝିଅ ପିଲା କିଏ ପଛକୁ ଚାହିଁଲେ ଲାଜରେ ଝାଉଁଳି ପଡେ

କଥା ପଚାରିଲେ ପାଟି ଖନି ବାଜେ ଧୀରେ ଅଭ୍ୟାସ ବଢେ

ଚିମୁଟା ଚିମୁଟି ଠେଲା ଠେଲି ସବୁ ଶିକ୍ଷକଙ୍କ ଆଢୁଆଳେ

ଧରା ପଡିଗଲେ ପିଠିରେ ଗଡିଆ ପୋଖରୀ କେତେ ଯେ ଖୋଳେ

ଏକାଦଶ ଶ୍ରେଣୀ ଆସିବାରୁ ଆଖି ଖୋଲିଗଲା ଧିରେ ଧିରେ

ରାଣିହାଟ ଠାରେ ହିନ୍ଦ ସିନେମା ରେଭେନ୍ସା କଲେଜ ଛକରେ

ମାଟ୍ରିକ ସରିଲା ରେଭେନ୍ସାରେ ଆସି କିଛି ସାଙ୍ଗ ହେଲେ ଭେଟ

ଆଉ କିଛି ସାଂଗ ପଛେ ରହିଗଲେ ନହେବାରୁ ଭଲ ଚାଟ

ବିଶ୍ୱନାଥ ଗଣିତର ଅଧ୍ୟାପକ ପ୍ରଶାନ୍ତ ଲୋକ ସଂପର୍କ

ଧନଂଜୟ ବ୍ୟାକ ଚାକିରୀରେ ବ୍ୟସ୍ତ ସେପଥେ ମୁହିଁ ପଥିକ

ସ୍କୁଲ ବେଳର ନିର୍ଦ୍ଦୋଷ ବନ୍ଧୁତା ଖୋଜିଲେ ନମିଳେ ଆଉ

ଆଜି ରାଗ ଋଷା କାଲି ମିଳାମିଶା ବେଂଚ ଅମର ରହୁ