ବିଦ୍ଯା ବନ୍ଧୁ ଉପକାରୀ

ଗାଡ଼ି ଯାଏ ଗଡି ଗଡି

ଚକ ଘିରି ଘିରି 

ଅଖ ଘିରି ଘିରି

ଯାତ୍ରୀ ବସିଥାଏ ଥିରି 

କରୁଥିଲେ ଗତି ପହୁଞ୍ଚଇ ହେଳେ

ଆପଣାର ଲକ୍ଷ୍ୟ ସ୍ଥଳୀ ।

ବଣି ଯାଏ ଉଡ଼ି ଉଡ଼ି

ଡେଣା ଝାଡି ଝାଡି

ଲାଞ୍ଜ ମୋଡ଼ି ମୋଡ଼ି

ଦେହ ମନ ଗଲେ ଥକି

ବସିଗଲେ ଦଣ୍ଡେ ନିରାପଦେ ମିଳେ

ଉଡ଼ାଣ ଆନନ୍ଦ ଶାନ୍ତି ।

ଡଙ୍ଗା ଯାଏ ଭାସି ଭାସି

ମଙ୍ଗ ଧରି ଧରି

କାତ ମାରି ମାରି

ମାରିଲେ ଆହୁଲା ପୁଣି

ଭାସିଚାଲେ ଡଙ୍ଗା ଏକୂଳୁ ସେକୂଳ

ହୋଇଯାଏ ନଈ ପାରି ।

ବରଷଇ ଝର ଝର

ନଈନାଳ ପାଣି ପାଣି

ବନବିଲ ପାଣି ପାଣି

ବରଷେ ଶୀତଳ ମଧୁ

ବିନ୍ଦୁ ବିନ୍ଦୁ ଜଳ  ମିଶିଗଲେ ହୁଏ

ଅଥଳ ସାଗର ସିନ୍ଧୁ ।

ପାଠ ଯାଅ ପଢି ପଢି

ଅଙ୍କ କଷି କଷି

ଶ୍ଳୋକ ଘୋଷି ଘୋଷି

ବିଷୟବସ୍ତୁକୁ ସ୍ମରି

ଅଭ୍ୟାସ କରିଲେ  ହୋଇବ ସଫଳ

ବିଦ୍ୟା ବନ୍ଧୁ ଉପକାରୀ ।

ଘଣ୍ଟା ଚାଲେ ଟିକ ଟିକ୍

କାମ ଠିକ୍ ଠିକ୍

ପାଠ ଠିକ୍ ଠିକ୍

ଉତ୍ତମ ସୁବ୍ୟବହାରେ

ଅରଜେ ମଣିଷ ସୁନାମ ପ୍ରଶଂସା

ସୁପ୍ରତିଷ୍ଠା ସଂସାରରେ ।