ବିବାହ

ନାରୀ ପୁରୁଷ ଙ୍କ ପବିତ୍ର ସମ୍ବନ୍ଧ

ଅଟେ ବିବାହ ବନ୍ଧନ,

ସମାଜ ସଂସାର ସଂବୃଦ୍ଧି ପାଇଁକି

ଏହା ବିଧାତା ବିଧାନ l

ନାରୀ ସାଜେ କନ୍ୟା ପୁରୁଷ ଟି ବର

ଦୁଇ ଆତ୍ମାର ମିଳନ,

ଅଲିଖିତ ଏକ ଚୁକ୍ତି ପତ୍ର ନାମା

ବେଦୀ ରେ ହୁଏ ଘୋଷଣ l

ପୁତ୍ର କନ୍ୟା ଯେବେ ସମର୍ଥ ହୁଅନ୍ତି

ଗଢନ୍ତି ନିଜ ସଂସାର,

ବିବାହରେ ତାହା ରୂପ ରେଖ ନିଏ

ମିଳନ୍ତି ଦ୍ବି ପରିବାର l

ବେଦ ମନ୍ତ୍ର ଆଉ ଅଗ୍ନି ସାକ୍ଷୀ ରଖି 

ହସ୍ତ ଗଣ୍ଠି କୁ ପକାଇ,

ଗୁରୁ ଗୁରୁଜନ ଆଶିଷ ଦିଅନ୍ତି

ହସ୍ତେ କୁସୁମ ବର୍ଷାଇ l

ଖୁସିରେ ମଗନ ହୁଅନ୍ତି ସମସ୍ତେ

ବାଜେ ଢୋଲ ଓ ମହୁରୀ,

ବନ୍ଧୁ ବାନ୍ଧବ ସାଇ ପଡିଶା ସହ 

ଭୋଜି ଭାତ ଥାନ୍ତି କରି l

ସୁଖେ ଦୁଖେ ଦୁହେଁ ସହଭାଗୀ ହୋଇ

ଚଳାନ୍ତି ଜୀବନ ପୋତ,

ପରସ୍ପର ପ୍ରତି ପ୍ରେମ ଭାବ ବହି

ହୋଇଥାନ୍ତି ସମର୍ପିତ l

ଆଦିବାସୀ ଜନ ବିବାହଟି ଭିନ୍ନ

ହାତ ଧରି ଟାଣି ନେଇ,

ବିବାହ କରନ୍ତି ସମ୍ପ୍ରଦାୟ ମଧ୍ୟେ

ନୃତ୍ୟ ଗୀତ କେତେ ଗାଇ l

କିଏ ବେଦୀ ପରେ କିଏ କଚେରୀ ରେ

ମସଜିଦ ବା ଗୀର୍ଜାରେ,

ବିବାହ ବନ୍ଧନେ ବାନ୍ଧି ହୋଇଯାନ୍ତି

ଅବା ଗାନ୍ଧର୍ବ ମତରେ l

ନାନା ଭାବେ ନାନା ବିବାହ ବିଧାନ

ବିରାଜେ ଏ ମହୀ ତଳେ,

ଭବିଷ୍ୟତ ପୀଢ଼ି ଗଢିବା ନିମିତ୍ତ

ଏହି ପରମ୍ପରା ଚଳେ l