ରାଗ

ରାଗ ଅଟେ ଜାଣ      ମଣିଷର ଲାଗି

        ସବୁଠୁ ବଡ ବଇରୀ

ଦିଏନାହିଁ କିଛି         ସବୁ ନିଏ ପୋଛି

       ସବୁଠୁ ବଡ ଭଗାରି ||

କ୍ରୋଦ୍ଧିତ ମଣିଷ         କି ପାପ ନ କରେ

      କହି ପାରିବ କି ଭାଇ?

ହିତାହିତ ଜ୍ଞାନ        ହରାଇ ବସେ ସେ

   କ୍ରୋଧାଗ୍ନିରେ  ଝାସ ଦେଇ||

ସବୁ ସମ୍ପର୍କର       ଲକ୍ଷ୍ମଣ ରେଖାକୁ

     କ୍ରୋଧେ ନର ଟପିଗଲେ

ଛଳରେ ଆସିଣ    କ୍ରୋଧର ରାବଣ

    ସବୁ ହରି ନେଇ ଚଳେ||

କ୍ରୋଧକୁ ଆୟତ୍ତେ   ରଖିଥିବ ଯେବେ

     ବିପଦ ଦୂରେଇ ଯିବ

ନିଜର ସମ୍ମାନ      ସବୁ ସୁସମ୍ପର୍କ

     ଅତୁଟ ହୋଇ ରହିବ||

ତେଣୁ ତୁମେ ନିଜ    କ୍ରୋଧକୁ ଆୟତ୍ତେ

      ରଖିବାକୁ ଶିଖ ଭାଇ

କ୍ରୋଧକୁ ଜିଣିଲେ    ସବୁ ଅଘଟଣ

       ଅଚିରେ ଯିବ ଦୂରେଇ||

କ୍ରୋଧେ କିଛି କାର୍ଯ୍ଯ    କରିବା ଆଗରୁ

      ଥରେ ହେଲେ ଭାବି ଦେଖ

ଯାହା କରୁଅଛ       ଠିକ୍ ଅବା ଭୁଲ୍

     ଥରଟେ ପରଖି ଦେଖ||

କାରଣ ପ୍ରତିଟି         ରାଗର ପ୍ରଭାବେ

        ତୁମେ କରୁଥିବା କାର୍ଯ୍ଯ

ତୁମ ଜୀବନରୁ        କିଛି ନା କିଛି ସେ

       ନେଇଯିବା  ଅନିବାର୍ଯ୍ଯ ||