ବିବାହ ସମୟ

ସମୟ ଆସିଲା ବିବାହର ଯେବେ

ଖୋଜିଲେ ଘରେ ସରକାରୀ ଚାକିରିଆ,

ଭଲ ପିଲା ପୁଣି ଚାକିରୀ ଖଣ୍ଡିଏ

କରୁଅଛି ପୁଣି ନୁହେଁ ସିଏ ମଦୁଆ ।

ଜ୍ୱାଇଁ ପାଇଲେ ସରକାରୀ ପିଲା

କରିଛି ସରକାରୀ ଚାକିରୀ ଖଣ୍ଡିଏ

ଘର ଠୁ ପଡୋଶୀ ସମ୍ପର୍କୀୟ ସବୁ

କୁହନ୍ତି ମିଳିଅଛି ଭଲପିଲାଟିଏ ।

ଖୁସିରେ ହୋଇଲା ବିବାହ ଝିଅର

ସଭିଙ୍କ ମନ ନାଚିଲା ଝୁମିଲା ଆଜି

ଝିଅ ଗଲା ଆଜି ଶାଶୁ ଘର ତା'ର

ନିଜକୁ ସୁନ୍ଦର ବୋହୂ ବେଶରେ ସାଜି ।

ଧୀରେ ଧୀରେ ଦିନ ବିତିଗଲା ହେଲେ

ପୂରଣ ହେଲା ନାହିଁ କାହାରି ସପନ

କିଛି କରିବାକୁ ଇଚ୍ଛା ଥିଲେ ମଧ୍ୟ

ଭାଙ୍ଗିଯାଏ ବାରମ୍ବାର ସଭିଙ୍କ ମନ ।

ଇଚ୍ଛା ମୁତାବକ କିଣିବାକୁ କିଛି

ଅପେକ୍ଷାରେ ଥିବୁ ମାସର ଦରମାକୁ

ଦରମା ଆସିଲେ କୋଉପଟେ ତାହା

ଚାଲିଯାଇ ଭାଙ୍ଗିବ ସଭିଙ୍କ ଇଚ୍ଛାକୁ ।

ଧନ୍ୟ ସରକାରୀ ଚାକିରିଆ ବାବୁ

ଛାତ ଘରେ ରହିବାର ସ୍ବପ୍ନ ସଭିଙ୍କ

ଧୀରେ ଧୀରେ ହେଲା ସବୁ ଚୁରମାର

ସଭିଙ୍କ ମନେ ଖେଳିଲା ନୂଆଁ ଆତଙ୍କ ।

ଇଚ୍ଛା ହୁଏ ଭଲ ଶାଢ଼ୀ ଖଣ୍ଡେ ହେଲେ

ଅପେକ୍ଷା କରଇ ମାସ ଶେଷ ଦରମାକୁ

ଏତେ ଦିନ ଯାଏ ଭୁଲିଯାଏ ଇଚ୍ଛା

ବୁଝାଇ ରଖିଣ ସିଏ ନିଜର ମନକୁ ।

ଚାକିରୀ ବିହୁନେ ଖୁସି ଆଜି ସର୍ବେ

ମିଳୁଅଛି ସଭିଙ୍କୁ ଟଙ୍କିକିଆ ଚାଉଳ

ମିଳୁଅଛି ପୁଣି ଛାତ ଘରଟିଏ

ବାହାରୁନି ତାଙ୍କରି ଦେହରୁ ଟିକେ ବି ଝାଳ ।

କାଳିଆ ଯୋଜନା ପରି ଆଉ କେତେ

ଯୋଜନାରେ ମିଳୁଅଛି ସଭିଙ୍କୁ ପାଉଣା

ଇଚ୍ଛା ମୁତାବକ ମିଳୁଛି ସଭିଙ୍କୁ

ଉଚିତ୍ ସମୟେ ଯାହାର ଯେଉଁ ଭାବନା ।

ସରକାରୀ କାମ ଯିଏ କରୁଅଛି

ସିଏ ଜାଣେ ତାଙ୍କରି ଘରର ଅବସ୍ଥାକୁ

ସମୟ ମିଳେନି କଥା ହେବାକୁ ବି

ତଥାପି ସଂଘର୍ଷ କରି ଚାଳଇ ନିଜକୁ ।