ଭୂତାଣୁଠାରୁ ବିପଦ ଜନକ

ଗୋଟିଏ କଥା ଗୋଟିଏ ଚର୍ଚ୍ଚା, ଚାଲିଛି ଘରେ ବାହାରେ,

କରୋନା ଆସି କଅଣ କଲା, ଆମରି ସୁନା ସଂସାରେ ?

ମାନବ ଜାତି କଲ୍ୟାଣ ପାଇଁ ପ୍ରଧାନମନ୍ତ୍ରୀ କହିଲେ,

ଦୀପଟି ଜାଳି ପ୍ରାର୍ଥନା କର ଭଲ ପ୍ରସ୍ତାବ ଥୋଇଲେ |

ଥୋକାଏ ବସି କହନ୍ତି ଆମେ ମାନିବୁ ନାହିଁ ନିୟମ,

ନିଜେ ମରିବୁ ସବୁ ମାରିବୁ ହୀନ ତାଙ୍କର କରମ |

ଭଲକଥା କେ କହିଲେ ତାକୁ ହସିକି ଦେବୁ ଉଡ଼େଇ,

ଦାୟିତ୍ୱହୀନ ଭାଷଣ ଦେବୁ ଦେଖାଇ ନିଜ ବଡ଼େଇ |

ଏଇ ଦେଶରେ ଅଛନ୍ତି ଲୁଚି ଅନେକ ଶିଖି ମନେଇ,

ଚରଣ ପରି ଶତ୍ରୁକୁ ଆଣି ଦିଅନ୍ତି ବାଟ ଦେଖେଇ |

ରାଜନୀତିର ପଶାପାଲିରେ କେତେକ ନାକ ଟେକନ୍ତି,

ଜାତି ଘାତକ ସଂସ୍କୃତି ମାରୁ ନିଜ ବିବେକ ବିକନ୍ତି |

ଛୁରୀ କାକୁଡ଼ି ହାତରେ ଯା'ର ସିଏ ତ କାଟି ଖାଉଛି,

ଯେତେ ଦରମା ପାଇଲେ ପୁଣି ତାକୁ ନିଅଣ୍ଟ ହେଉଛି |

ଗରିବ ଧନ ବିଷ ସମାନ ଖାଇବା ଲୋକ ମରିବ,

କୌଶଳ କରି ଖସିଗଲେ ବି ପରିବାର ହିଁ ଭୋଗିବ |

ଲୁଟେରା କିଛି ଚାକିରୀ କରି ଅଛନ୍ତି ସରକାରରେ,

ଲାଞ୍ଚ ମିଛରେ ଧନ ବଢ଼ାନ୍ତି ନାକ ବୁଡ଼େଇ ହାଣ୍ଡିରେ |

ଧରା ପଡ଼ିଲେ ନିଜର ସିନା ମାନ ମହତ ଯାଉଛି,

ଯାହାପାଇଁ ସେ ଧନ ସଞ୍ଚୁଛି ଅକର୍ମା ଚୋର ହେଉଛି |

ଭୂତାଣୁ ଠାରୁ ବେଶି ବିପଦ ହୀନବୁଦ୍ଧିର ମଣିଷ,

ବଗ ମୁଣ୍ଡରେ ଲାଗିବ ଅଠା କାଉ ଖାଉଛି ପଣସ |