🌹ଭୂଲିବାନି 🌹

ଯେ ଦେଶେ ଗଙ୍ଗା ଯମୁନାର ଧାର

     ସିଞ୍ଚଇ ପବିତ୍ର ନୀର

ସେହି ମାଟି ମା କୋଳରେ ଜନମ

     ହୋଇଛନ୍ତି କେତେ ବୀର

ମସ୍ତକରେ ଶୋଭେ ତୁଙ୍ଗ ହିମଗିରି

      ସୁଷମାରେ ଭରା ଶିର

ପବିତ୍ର ଜଳରେ  ଚରଣ ଧୁଅଇ

      ମହୋଦଧି ନିତି ଯାର

କେତେ ମୁନି ଋଷି ସାଧନାରେ ବ୍ରତୀ

      ଦେଇଛନ୍ତି ନୂଆ ରାହା

ଜଗତ କଲ୍ୟାଣ ମାନବ ହିତରେ

      ହୋଇଅଛି ସଦା ସାହା

ପ୍ରତିଟି ରେଣୁରେ ଓଁକାର ଶବଦ

       ଶୁଭଇ ସାରା ଭୂବନ

କୋଣ ଅନୁକୋଣେ ସମୀର ତରଙ୍ଗ

       କରୁଅଛି ଜୟଗାନ

ମାଆ ପରି ସ୍ନେହ ଆଦର ପରଶେ

       ତୋଷଇ ମନକୁ ଜାଣି

ଅଭାବ କଷଣେ ରଖେନି କାହାକୁ

       ଯୋଗାଏ ଆହାର ପୁଣି

କଳକାରଖାନା ଖଣି ଖାଦାନରେ

        ରତ୍ନ ଗର୍ଭା ମୋ ଜନନୀ

ତା ମାନ ମହତ ରଖିବା ଯେ ଟେକ

        ଏ କଥାକୂ ଭୂଲିବାନି