ଭୁଲି ନାହିଁ ଭୁଲିବିନି ପ୍ରିୟା
ଭୁଲି ନାହିଁ ଭୁଲିବିନି ପ୍ରିୟା
ତୁମେ ମୋ ମଧୁର ଜୀବନର ସ୍ୱପ୍ନ
ଭୁଲି ନାହିଁ ଭୁଲିବିନି
ତୁମ ମନେ ଦୁଖଃ କିବା ମନସ୍ତାପ
ଅସହ୍ୟ ଭଲ ଲାଗେନି ।
ଦେଇଥିଲି କଥା ପ୍ରିୟା ଗୋ ତୁମକୁ
କଥା ମୋ ରଖି ପାରୁନି
ରଜ ସାବିତ୍ରୀକୁ ତୁମ ଖୁସି ପାଇଁ
ଏଥର ଯାଇ ପାରୁନି ।
ରଖିଥିଲି କିଣି ତୁମ ପାଇଁ ଶାଢ଼ୀ
ନାଲି ନାଲି ଶଙ୍ଖା ଚୁଡି
ପିଲାଙ୍କ ମାପର ନୂତନ ପୋଷାକ
ନୂଆ ଖାତା ବହି ଘଡି ।
ସୁଆଦିଆ ଖଜା ଲଡୁ ଓ ମିଠେଇ
କରିଥିଲି ବି ବରାଦ
ପଣ୍ଡ ହୋଇଗଲା ସମସ୍ତ ପ୍ରସ୍ତୁତି
ଛୁଟି ହୋଇଗଲା ରଦ୍ଦ ।
ଡାକରା ପାଇ ମୁଁ ଯାଉଛି ତୁରନ୍ତ
ସୀମାନ୍ତ ଅରୁଣାଚଳ
ଯେଉଁଠି ଚାଇନା ଆସୁଅଛି ମାଡି
ଧରି ଖଳ ସୈନ୍ୟ ବଳ ।
ଆମ ଭାରତର ପୂରୁବ ପ୍ରଦେଶ
ହୁଏ ଯହିଁ ସୂର୍ଯ୍ୟୋଦୟ
ଉତ୍ତରେ ତାହାର ତିବ୍ବତ ଅଞ୍ଚଳ
ସୀମା ଅଟେ ବିବାଦୀୟ ।
ଦୁର୍ଗମ ଅତ୍ୟୁଚ୍ଚ ପର୍ବତ ଶିଖର
ସର୍ବଦା ବରଫାଚ୍ଛନ୍ନ
କରିବୁ ଶତ୍ରୁର ବଧ ପ୍ରତିରୋଧ
ସଜଗତା ଅନୁକ୍ଷଣ ।
ଦେଶର ସୁରକ୍ଷା ସୈନ୍ୟ ପରାକାଷ୍ଠା
ବଡ଼ କର୍ତ୍ତବ୍ୟ ଆହ୍ୱାନ
ଜାତି ହିତ ଆଗେ ତୁଚ୍ଛ ବ୍ୟକ୍ତି ସ୍ୱାର୍ଥ
ସୈନ୍ୟ ଦିଏ ବଳୀଦାନ ।
ଏ ଦେଶ ସୈନିକ କୃଷକ ଶ୍ରମିକ
ଗାଏ ଜନ ଗଣ ମନ
ମୋ ଦେଶ ମହାନ ବି6ଶ୍ୱ ଅଦ୍ୱିତୀୟ
ଉତ୍କର୍ଷ ବେଦ ବିଜ୍ଞାନ ।
ହୃଦୟ ତୁମର ସବୁଜ ସୁନ୍ଦର
ଭଣ୍ଡାର ପ୍ରେମ ମମତା
ଅତୁଟ ରହୁ ଗୋ ପ୍ରିୟା ଅନୁପମା
ଏହି ମୋ କାମନା ଇଚ୍ଛା ।
ଯାଇ ପାରୁନାହିଁ ପ୍ରିୟା ତୁମ ପାଶେ
ଦୁଃଖ ଜମା କରିବନି
ରଖି ପାରୁନାହିଁ କଥାଟି ତୁମର
ଭୁଲ କେବେ ବୁଝିବନି ।
ଫୁଟୁ ସଜଫୁଲ ସ୍ମିତ ମଧୁ ହାସ୍ୟ
ପ୍ରିୟା ଓଠେ ଦେଶ ହିତେ
ଜାଗି ଉଠୁ ବୀର ହୃଦୟ ଆବେଗ
ସମର୍ପିତ ମୁଁ ଏକନିଷ୍ଠେ ।