ଭୁଲ ଠିକଣା

କହିଥିଲ ତୁମେ ଆସିବାକୁ ହେଲେ

ଦେଇଥିଲ ବେଶି ପ୍ରତିଶ୍ରୁତି ବଳେ ।

ଆଶାର ଆକାଶ ଦେଖାଇଲ ପାଶେ

ମନ ପ୍ରଜାପତି ଉଡ଼ିଲା ଆକାଶେ ।

ଡେଇଁ ଡେଇଁ ଗୀତ ରଚନା କରିଲ

ଖୁସିରେ ପାଗଳ ହୋଇକି ବସିଲ ।

ବହୁ ଅନୁପ୍ରାସ କରିଲ ସ୍ମୃତିରେ

କେତେ ନୂଆ ଆଶା ବାନ୍ଧିଲ ମୋଠାରେ ।

ତୁମେ ମୋର ପ୍ରୀତି ତୁମେ ହେଲ ପୋଥି

ରଙ୍ଗର ଫଗୁଣ ବୋଳିଲ ଯେ ସାଥୀ ।

ତୁମ ବିନା କିଛି କାରଣ ଜୀବନେ

ନାହିଁ ବୋଲି କେତେ କହିଲ ଭୁବନେ ।

ଆସିଥିଲ ସାଥେ ସାଙ୍ଗ ହୋଇଯିବା

ପୁଣି କାହିଁଗଲା ସେ ଦିନର ଡ଼ାବା ।

ଡାକି ଦେଇଗଲ ତୁମର ଠିକଣା

ନ ଆସିଲେ ପ୍ରୀତି ଗଲା ସବୁ ଜଣା ।

ଭାବିଲି ଅନ୍ତତଃ ଦେଖା କରେ ଆସି

ଜଣାଯିବ ତା'ର ସରଳ ବିଶ୍ୱାସୀ ।

ଭାବ ରଖି ପାଦ ପକାଇ ବାହାରି

ଗଲି, ଦେଇଥିବା ଠିକଣା ପଚାରି ।

କାହିଁ ସେଇ ସ୍ଥାନ କାହିଁ ସେହି ମନ 

ନ ମିଳିଲା ମୋତେ ଫେରିଲି ବହନ ।

ଜାଣିଥିଲି ହେଲେ ପଛରେ ଚାଲିଲି

ଭୁଲ ଠିକଣାକୁ ମନରେ ଧରିଲି ।

ଯାହା ହେଲା ସବୁ ଆଗରୁ ଜାଣିଲି

ପଶ୍ଚାତାପ ବେଶୀ ମନରେ ଆଣିଲି ।

ଏହା ଥିଲା ମୋର ପ୍ରଥମ କାହାଣୀ

ଆଉ ହେଲା ନାହିଁ ପୀରତି ଚାହାଁଣି ।