ଭସାଇ ନିଅ ଗୋ ତବ ପ୍ରେମସ୍ରୋତେ
ଭସାଇ ନିଅ ଗୋ ତବ ପ୍ରେମସ୍ରୋତେ
ଓଠରେ ମୋ ଅଛି ପ୍ରୀତିର ପୀୟୁଷ
ଆଖିରେ ଚୋରା ଚଇତି
ପିଇଯାଅ ତୁମେ ସେହି ପ୍ରୀତିମଧୁ
ମନ ଇଛା ଯେତେ ସାଥି ।
ମୋର ଗାଲେ ବୋଳି ପ୍ରୀତିର ଅବିର
ମନକୁ ରଙ୍ଗେଇ ଦିଅ
ମୋ ପ୍ରୀତି ସୁମନ ଗ୍ରହଣ କରିଣ
ବାହୁର ବନ୍ଧନେ ନିଅ ।
ହଜିଯିବି ମୁହିଁ ତୁମରି କୋଳରେ
ଭିଜିବି ପ୍ରେମ ବାରିରେ
ତୁମେ ମୋର କୃଷ୍ଣ ସାଜିବି ମୁଁ ମୀରା
ଲୀନ ହେବି ତୁମଠାରେ ।
ତୁମେ ସାଗର ମୁଁ ପ୍ରଗଳ୍ଭା ତଟିନୀ
ଲୀନ ହେବି ତୁମ ଠାରେ
ତୋଳିନିଅ ମୋତେ ତୁମରି ବାହୁରେ
ତୁମ ବିଶାଳ ଛାତିରେ।
ପ୍ରୀତି ଭରେ ମୋତେ ଝୁଲାଇ ଦିଅ ଗୋ
ତୁମ କୋଳ ଝୁଲଣାରେ
ଭସାଇ ନିଅ ଗୋ ତବପ୍ରେମ ସ୍ରୋତେ
ଅମାନିଆଁ ମନ ଝୁରେ ।