ଭରିଦେ ଆଞ୍ଜୁଳି ମୋର

ଅବ୍ୟକ୍ତ ଅବୁଝା ଅଧାଗଢ଼ା ତୁମେ

ଜଗତ ଠାକୁର ବୋଲି

ସଭିଏଁ ଜାଣନ୍ତି ପ୍ରଣତି ବାଢ଼ନ୍ତି

ଆକୁଳେ ଅନ୍ତର ଖୋଲି ll

କଳା ଦିଅଁ ତୁମ ଷୋହଳ କଳାର

କୋଟି ଲାବଣ୍ୟକୁ ଦେଖି

ହୃଦୟ ମନ୍ଦିର ହୁଏ ପୁଲ୍ଲକିତ

ଆଖି ଯାଏ ଦଣ୍ଡେ ଲାଖି ll

ନୟନରୁ ନୀର ବହିପଡ଼େ ଧାର

ଗରୁଡ଼ ଖୁମ୍ବର ପାଶେ

ରଖ ମହାବାହୁ ଧାଇଁ ମୁଁ ଆସିଛି

ପାପ ଛଡ଼ାଇବା ଆଶେ ll

ଜଗତର ଦୁଃଖ ହରିବା ପାଇଁକି

ନୀଳାଚଳେ ଅଛ ରହି

ରତ୍ନ ସିଂହାସନେ ଦେଉଛ ଦର୍ଶନ

ଆଶିଷ ପସରା ବହି ll

ହାତ ଟେକି ଦେଇ ଡାକୁଛି ଠାକୁରେ

ଜଗନ୍ନାଥ ରକ୍ଷା କର

ସବୁ ଦୁଃଖ ନେଇ ଖୁସି ଟିକେ ଦେଇ

ଭରିଦେ ଆଞ୍ଜୁଳି ମୋର ll