ଭୋକ
ଭୋକ
ଦେଖା ହେଲା ବେଳକୁ
କାଦୁଅର ଗୋଟେ ଚଟାଣ
ଉପରେ ସିଏ ବସିଥିଲା
ପାଖକୁ ଆସିଲି
ସେ କାନ୍ଦିବା ଆରମ୍ଭ କଲା ।
ଭୟରେ ପଚାରିଲି
କଣ ହେଲା
ଚିରାଲୁଗା ତଳେ ବାନପ୍ରସ୍ଥ ପାଳନ କରୁଥିବା
ପେଟକୁ ହାତ ବଢେଇ କହିଲା
"ଭୋକ" ।
ବ୍ୟାଗ୍ ଖୋଲୁଥିବା ବେଳେ କହିଲି
ଖାଇବୁ
ମୁଣ୍ଡ ହଲେଇ ମନା କଲା
କିନ୍ତୁ
ବେସୁରା ହେଇ ଆସୁଥିବା
କାନ୍ଦରେ ଗୋଟେ ନୂଆ ରାହା ଲଗେଇ
ଫେର୍ ପେଟକୁ ଚାପି ଦେଇ କହିଲା
"ଭୋକ" ।
ଗହୀରିଆ ଆଖିର ବିନତୀ
କହୁଥିଲା କିଛି କଥା ଯେମିତି
ଆଉଁସି ଦେବି ବୋଲି
ହାତ ବଢେଇଲି
ବୈକଲ୍ୟର ପେଟକୁ
ଛୁଇଁଲା ପରେ ଜାଣିଲି
ସେଠି ଖାଲି ଭୋକ ହିଁ ଅଛି
ପେଟ କେବେ ନ ଥିଲା କି ନାହିଁ ।