ଭଙ୍ଗା ଆଇନାରେ ମୁହଁ
ଭଙ୍ଗା ଆଇନାରେ ମୁହଁ
1 min
362
ଭଙ୍ଗା ଆଇନାରେ ନିଜର ମୁହଁକୁ
ଦେଖିଦେଲେ ବେଳେବେଳେ
ଅଚିହ୍ନା ଲାଗଇ ନିଜ ମୁହଁ ଗୋଟି
ମନ ଭରେ କୌତୁହଳେ I
କାହିଁକି ଭାଙ୍ଗିଲା ଆଇନା ଗୋଟିକ
କିଏସେ ଭାଙ୍ଗିଲା କୁହ
ହସି ଉଠୁଥିଲେ କାଚର ଟୁକୁଡା
ଆଖି ଖୋଜୁଥିଲା ଲୁହ I
କେତେ ସରାଗରେ ନିଜମୁହଁ ଗୋଟି
ନିଜେ ମୁଁ ଦେଖିବି ବୋଲି
ହୃଦୟରେ ଭରି ଆବେଗ ଅନେକ
ଆଖି ଦେଇଥିଲି ଖୋଲି I
ନିଜ ମୁହଁ ଗୋଟି ନିଜର ଆଖିରେ
କେହିକେବେ ଦେଖିନାହିଁ
ଆଇନା କେବଳ ସାହାରା ଦେଉଛି
ନିଜକୁ ଦେଖିବା ପାଇଁ I
ଆଇନା ଗୋଟିକ ଭାଙ୍ଗିଦେଲ କିଆଁ
ଆଉ କେ ସାହାରା ଦେବ
ଭଙ୍ଗା ଆଇନାରେ ନିଜର ମୁହଁକୁ
କେମିତି ବା ଦେଖି ହେବ I