"ଭଲପାଇ ଯଦି..."

ଭଲପାଇ ଯଦି ଭୁଲିବାର ଥିଲା

ଭଲ ପାଉଥିଲ କିଆଁ

କି'ଲାଭ ପାଇଲ ମନ ଉପବନେ

ଜାଳି କାମନାର ନିଆଁ

ଭଲପାଇ ଯଦି

କେତେ ଯତନରେ ଶେଜ ପାରିଥିଲି

ପ୍ରଣୟ ସପନେ ମାତି

କେତେ ତାତି ଛାତି ଭିତରେ ବିତିଲା

ତୁମେକି' ବୁଝିବ ସାଥୀ,

ଭଲ ପାଇବାର ସରାଗ ଟିକକ

ଉଡ଼ିଗଲା ହୋଇ ଧୂଆଁ

ଭଲପାଇ ଯଦି

ବାତାୟନ ପାଶେ ବସିଲି ଏକାନ୍ତେ

ଆସିବାର ବାଟ ଚାହିଁ

ଅଲାଜୁକି ଜହ୍ନ କଣେଇ ଚାହିଁଲା

ସରମରେ ଗଲି ନଇଁ,

ପଚାରିଲା ସହି ଆସିବେକି କେହି

କହିଦେଲି ତୁମ ନାଆଁ

ଭଲପାଇ ଯଦି

କଥା ଦେଇଥିଲ ପହିଲି ଆଷାଢେ

ଫେରି ଆସିବ ମୋ'ପାଶେ

ଦେହମନ ମୋର ଛୁଇଁ ଦେଇଯିବ

ତୁମ ନହୁଲି ପରଶେ,

କେମିତି ଭୁଲିବି ଭୁଲି ହେଉନାହିଁ

ତୁମରି ପହିଲି ଛୁଆଁ

ଭଲପାଇ ଯଦି