ଭଲ ମନଟିଏ

ଭଲ ମନଟିଏ ସବୁଠି

ଚଳେ ଖାପଖୁଆଇ 

ସମ ବିଷମ ଅବସ୍ଥାରେ

ମତି ସମ ରଖଇ ।

ପରକୁ ଆପଣା ମଣଇ

ନଥାଏ ଅହଂକାର

ନିରିମଳ ସ୍ନେହ ମମତା

ଭରିଥାଏ ଅନ୍ତର ।

ମିଠା କଥା ସଦା ତୁଣ୍ଡରୁ

ତା'ର ଝରି ପଡ଼ଇ

ଜଟିଳ ନୁହଁଇ ସରଳ

ମୁଖଭଙ୍ଗୀ କହଇ ।

ଆନ ସୁଖଦୁଃଖ ବୁଝଇ

ତା'ର ପାରିଲାପଣ

ହସ ଉକୁଟାଏ ମୁଖରେ

ହରି ନେଇ କଷଣ ।

ସଭିଙ୍କୁ ଆଦର କରି ସେ

ନିଜେ ଲଭେ ଆଦର

ରହଇ ସକଳ ହୃଦୟେ

ସିଏ କରିକି ଘର ।

ଦୟା କ୍ଷମା ତା'ର ହୃଦୟେ

ସଦା ବିରାଜି ଥାଇ

ପରଶ୍ରୀକାତର ଈର୍ଷାକୁ

ମନୁ ଥାଏ ଦୂରେଇ ।

ସତ୍ୟ ଧର୍ମ ନ୍ୟାୟ ପଥରେ

ନିତି ଚାଲଇ ବାଟ

କେବେ କେଉଁ ମନ୍ଦ ଚିନ୍ତାରେ

ନ ହୁଅଇ ଉଚ୍ଚାଟ ।

ନିଜ ଭୁଲ୍ ତ୍ରୁଟି ସମୀକ୍ଷା

କରି ପ୍ରତି ମୁହୂର୍ତ୍ତ

ନିଜକୁ ସୁଧାରି ପାରଇ

ଦେଇ ସତ୍ୟର ସାଥ ।

ଚିନ୍ତା ଚେତନାକୁ ଖଟାଏ

ସମାଜର ମଙ୍ଗଳେ

ଈଶ୍ବର ଚିନ୍ତନେ ରହିଣ

ଶୁଭାଶିଷକୁ ତୋଳେ ।

ସଭିଙ୍କ ସୁଖରେ ନିଜର

ସୁଖ ଲୁଚିଛି ବୋଲି

ଏକଥାଟି କେବେ ମନରୁ

ସିଏ ନଥାଏ ଭୁଲି ।

ହସଖୁସି ବାଣ୍ଟି ଆନକୁ

ଆତ୍ମତୃପତି ଲଭି

ଭଲ ମନ ଧରି ସଂସାରେ

ଥାଏ ବିଭୁଙ୍କୁ ସେବି ।