Library
Profile
ଭକ୍ତି ପରୀକ୍ଷା
ଭକ୍ତି ପରୀକ୍ଷା
ଶକ୍ତି ନିକଟରେ ଭକ୍ତିର ପରୀକ୍ଷା
କେମିତି ନେବୁରେ ତୁ
ହାରି ମୁଁ ସାରିଛି ତୋ ପାଖେ କାଳିଆ
ଭଲରେ ଜାଣିଛୁ ତୁ ।
ତୋ ପାଇଁ ଆଖିରେ ଭରା ମୋ ସପନ
ଏବେବି ରହିଛି ବାକି
କଣ୍ଟକିତ ଏଇ ଚଲାପଥେ ପାଦ
ଯାଇନି କେବେ ଅଟକି ।
ଏବେବି ତୋ ପରେ ରହିଛି ଭରସା
ତୁ ମୋ ଜୀବନ ତୁ ମୋର ଆଶା
ତୋ ବିନା ନାହିଁରେ ମୁଁ ।
ଭଲରେ ଜାଣିଛୁ ତୁ ।
ଏତେ ବଡ ଏଇ ଦୁନିଆରେ ତୋର
ସାହା ମୋର କେହି ନାହିଁ
ତୋ ହାତ ଧରି ଚାଲୁଛିରେ ବାଟ
ଚାଲୁ ଥିବି ଏକା ମୁହିଁ ।
ଆସୁରେ ଜୀବନେ ଯେତେ ଦୁଃଖ କଷ୍ଟ
ହସି ହସି ଯିବି ପିଇ
ତୁ ସାଥେ ଥିଲେ ସେଇ ମୋର ଖୁସି
ସବୁ ବାଧା ଯିବି ଡେଇଁ ।
ଆସୁରେ ଜୀବନେ ଝଡର ତୋଫାନ
ଲିଭି ଯାଉ ପଛେ ଏ ମୋର ଜୀବନ
ତୋ ସାଥେ ରହିବି ମୁଁ ।
ଭଲରେ ଜାଣିଛୁ ତୁ ।
ଆମ ଏ ସମ୍ପର୍କ ନୁହେଁ କ୍ଷଣସ୍ଥାୟୀ
ସହଜରେ ଭାଙ୍ଗି ଯିବ
ଜନ୍ମ ଜନ୍ମ ପାଇଁ ତୋ ପାଦେ କାଳିଆ
ଏ ମନ ମୋ ରହି ଥିବ ।
ଯେତେ ପରୀକ୍ଷା ତୁ ନେବୁରେ କାଳିଆ
ମୋର କିଛି ମନା ନାହିଁ
ତୋହରି ପାଖରୁ ଦୂରେଇ ଦେଲେ ତୁ
କେବେ ଛାଡିବିନି ମୁହିଁ ।
ତୁ ଦେହ ହେଲେ ମୁଁ ତୋହର ଛାଇ
ଛାଇ କହ କେବେ ଅଲଗା କି ହେଇ
ବୁଝିରେ ସାରିଛୁ ତୁ
।
ତୋ ବିନା ନାହିଁରେ ମୁଁ ।
ଏ ଦୁନିଆ ଅଟେ ଛଲନାର ଘର
ସ୍ବାର୍ଥରେ ସମସ୍ତେ ବାଇ
ତୋତେ ପାଇ ଆଜି ଦୁଃଖ ମୁଁ ଭୁଲିଛି
ତୋ ପାଇଁ ରହିଛି ଜୀଇଁ ।
ତୋ ପାଦେ ଆଶ୍ରୟ ନେଇଛି କାଳିଆ
ଏ କଥା ତୁ ଜାଣି ଅଛୁ
ଯୁଗ ଯୁଗ ପାଇଁ ସାଥେ ରହିବାକୁ
ତୁ ମୋତେ କଥା ଦେଇଛୁ ।
ଭୁଲିବାକୁ ଜମା ଚେଷ୍ଟା କରିବୁନି
ମାୟାଧର ମାୟା ଖେଳ ରଚିବୁନି
ପାରିବିନି ଜିତି ମୁଁ ।
ଭଲରେ ଜାଣିଛୁ ତୁ ।
ତୋ ପାଇଁ ବଞ୍ଚିଛି ଲୁହରେ ଭିଜୁଛି
ଓଠରେ ଖେଳୁଛି ହସ
ସେ ହସ ପଛର ଅଭୁଲା କାହାଣୀ
ମଶାଣୀ ଭୂଇଁ ପାଉଁଶ ।
ଭୁଲେଇ ଦେଇଛୁ ଅତୀତ କାହାଣୀ
ଅତୀତର ଇତିହାସ ।
ତୋତେ ଦେଖି ଦେଲେ ସତରେ କାଳିଆ
ଓଠେ ମୋ ଖେଳୁଛ ହସ ।
ଅଢେଇ ଦିନର ଏଇତ ଜୀବନ
ସେଇ ଜୀବନ ବି ଅଟେ ତୋର ଦାନ
ଏ କଥା ଜାଣିଛୁ ତୁ ।
ତୋ ପାଇଁ ଅଛିରେ ମୁଁ ।
ତୋ ଭକ୍ତି ପରୀକ୍ଷା ତୁରେ ଜାଣିଛୁ
ମୁଁ ରେ ଜାଣିନି କିଛି
ପାଉଛି ମୁଁ ଭଲ ପାଉ ଥିବି ତୋତେ
ଏକଥା କହି ଦେଉଛି ।
ହାରିବା ଜିତିବା କିଛି ବି ଜାଣିନି
ତୋତେ ମୁଁ ଭଲ ପାଏ
ସେ ଭଲ ପାଇବା ରହିଛି ରହିବ
ଶେଷ ନିଃଶ୍ବାସ ମୋ ଯାଏ ।
ତୋ କଥା ଭାବି ତୋ ପ୍ରେମରେ ହଜି
ତୋତେ ଦେଖି ଦେଖି ଆଖି ଦେବି ବୁଜି
ତୋ ବିନା ନାହିଁରେ ମୁଁ ।
ଭଲରେ ଜାଣିଛୁ ତୁ ।
