ଭକ୍ତି ଅର୍ଘ୍ୟ

ମନ ମନ୍ଦିରକୁ ଆସିବ ବୋଲି 

ହୃଦୟ ଅଗଣା ରଖିଛି ଖୋଲି |

ତୁଳସୀ ଗଜରା ଗୁନ୍ଥି ରଖିଛି 

ଚନ୍ଦନ ପାଣିକୁ ସିଞ୍ଚି ଦେଇଛି |

ମଲ୍ଲୀମାଳ ଗୋଟେ ଦେଇଛି ଗୁନ୍ଥି 

ନାଲି ସିନ୍ଦୁରେ ମୁଁ ଭରିଛି ସିନ୍ଥି |

ପଖାଳ କଂସାରେ ଦହିର ଛୁଙ୍କ 

ଶାଗଭଜା ଲାଗି ତୁମେତ ରଙ୍କ |

ଘର ଅଗଣାରେ ବସିବା ପାଇଁ 

କୁସୁମରେ ଶେଯ ଅଛି ସଜାଇ |

ଝୁଲିଝୁଲି ଆସ ମୋ ବେଣୁପାଣି 

ତୁମକୁ ଝୁରୁଛି ଟଙ୍କ ତୋରାଣି |

ଗରିବ ଅଗଣା ଧନ୍ୟ ମୋ ହେବ 

ଚରଣ କମଳ ଯେବେ ଥାପିବ |

ଆନନ୍ଦାଶ୍ରୁ ଧାରେ ଧୋଇବି ପାଦ 

ଧନ୍ୟ ହେବ ନେତ୍ର ଦେଖି ଗୋବିନ୍ଦ |

ନରଜନ୍ମ ମୋର ସାର୍ଥକ ହେବ 

ଭଵ ସଂସାରରୁ ମୁକ୍ତି ମିଳିବ |