ଭଜ ବାବୁ ରାମ ନାମ

ପୁଅ ଅଳ୍ପାୟୁଷ ଜାଣିଲେ ଯେମିତି

ରାଣୀ ହୋଇଲେ ଅଥୟ

ପୁଅର ଜୀବନ ବଞ୍ଚାଇବା ପାଇଁ

ଖୋଜହେ କିଛି ଉପାୟ।

ପୁଅ ଯଦି ତୁମ ଯୋଗୀ ପାଲଟିବ

ହୋଇଯିବ ସେ ଅମର

ଗୃହସ୍ଥ ହୋଇଲେ ଅକାଳ ମରଣ

ନିଶ୍ଚୟ ହେବ ତାହାର।

ପୁଅକୁ ବୁଝାନ୍ତି ମାଆ ପାଖେ ବସି

ଭଜବାବୁ ରାମ ନାମ

ଭଜି ନ ପାରିଲେ ମୋ ଧନ ସଙ୍ଖାଳି

ବାନ୍ଧିନେବ କାଳଯମ।

ମାୟା ମୋହେ ବାନ୍ଧି ହୋଇଛୁରେ ବାବୁ

ପ୍ରେମରେ ହୋଇଛୁ ଭୋଳ

ସେଇ ପ୍ରିୟ ପତ୍ନୀ ସୁଖରେ ବଞ୍ଚିବ

କାନ୍ଦିଦେଇ ଅଳ୍ପକାଳ।

ଧନ ସମ୍ପତ୍ତିର ପଛେ ଗୋଡେଇଛୁ

ସାଥୀରେ କିଛି ନ ଯିବ

ସୁନ୍ଦର ଶରୀର ମଡା ପାଲଟିବ

ପ୍ରାଣ ପକ୍ଷୀ ଉଡିଯିବ।

ବେଳ ଥାଉ ବନ୍ଧ ବାନ୍ଧରେ କୁମର

ଯୋଗୀ ହୋଇ ଭଜ ରାମ

ସେଇ ନାମପାଖେ ଏତେ ଶକ୍ତିଅଛି

ଛୁଇଁ ନ ପାରିବ ଯମ ।

ରାଜପଦ ବଡ ସୁଖଲୋ ଜନନୀ

ଯୋଗୀ କାମ ବଡ ଦୁଃଖ

ଖରା ବରଷାରେ ଭୋକ ଉପାସରେ

ଘରଘର ମାଗେ ଭିକ।

ତୁହି ଯୋଗୀଘର ଗଲେରେ କୁମର

ସନ୍ତୋଷ ମନରେ ମୋର

ଦୂରେ ଥାଆ ପଛେ ବଞ୍ଚିକରି ଥାଆ

ଦେଖୁଥାଏ ମୁଖ ତୋର।