ଭିଟାମାଟି
ଭିଟାମାଟି
ହାତ ଠାରି କହେ ଚାଳଘର ମୋର
ପଡିଥାରେ ବାବୁ ଏଠି,
ଏଇଠି ରହିବୁ ଯିବୁନି ଦାଦନ
ଏଇ ତୋର ଭିଟାମାଟି ।
ଯେଉଁଠି ଜନ୍ମିଲେ ମୋ ପୂର୍ବ ପୁରୁଷ
ସେହି ମୋର ଜନ୍ମମାଟି,
ସେଠାରେ ଜଳିଲା ଏନ୍ତୁଡ଼ି ମୋହର
ପୂଜା କରା ଗଲା ଷଠି ।
ସେହି ସ୍ଥାନ ମୋର ଅଟେ ପୂଣ୍ୟ ପୀଠ
ପୂର୍ବଜଙ୍କ ଆତ୍ମାଭରା,
ସେଇଠି ବଢ଼ିଛି ଫୁଲିଛି ଫଳିଛି
ସେଇଠି ମରିବି ପରା ।
ପୂର୍ବଜ ଆଶିଷ ଅତୁଟ ବିଶ୍ୱାସ
ଯେଉଁଠାରେ ଅଛି ରହି,
ସେ ଆଶିଷ ମୋର ଜୀବନେ ଆଧାର
ସୁଖରେ ଚଳିବା ପାଇଁ ।
ସେହି ସ୍ଥାନ ଅଟେ ଅତୀବ ପବିତ୍ର
ନଇଁ ଯାଉଥାଏ ମଥା,
ସେହି ସ୍ଥଳେ କିଛି ଅଘଟଣ ହେଲେ
ହୃଦୟେ ଲାଗଇ ବ୍ୟଥା ।
ଭିଟାମାଟି ମୋର ସ୍ଵର୍ଗଠୁଁ ସୁନ୍ଦର
ସେହି ମୋର ପୂଣ୍ୟଭୂଇଁ,
ତ୍ୟାଗ କରିବିନି ଭିଟାମାଟି କେବେ
ସୁଖରେ ରହିଛି ତହିଁ ।