ଭିନ୍ନ ଏକ ମା

ଅନେକ୍ ହିସାବ ନିକାଶ ପରେ

ତୋତେ ଦେଲା ଜରାୟୁରେ ସ୍ଥାନ 

ସହିଲା ଗର୍ଭ ଯନ୍ତ୍ରଣା

ଦଶମାସ ଦଶଦିନ

ଦେଲୁ କୁଆଁ କୁଆଁ ଡାକ

ଦେଖିଲୁ ଦୁନିଆ ଆଲୋକ

ହେଲେ ତୁ ହେଲୁ ଆଉ କାହାର

ତା କୋଳ ହେଲା ତୋ ପାଇଁ ସାତପର

ଜାଣିଛୁ ବାବା ! 

କିଛି ଅର୍ଥ ବଦଳରେ 

ବିକିଦେଲା ତା'ର ମାତୃତ୍ୱ 

କରିନେଲା ପୁଣି ଏହାକୁ ଜୀବନର ବ୍ରତ।

ତୋ ପାଇଁ 

ତା'ର ସବୁ ଭାବପ୍ରବଣତା ମୂଲ୍ୟହୀନ

କହିଲୁ, ଭାବନାକୁ କ'ଣ 

ବାଦ୍ ଦେଇପାରେ ବିଜ୍ଞାନ

ସେଇଥିପାଇଁ ତ ଗର୍ଭର ସନ୍ତାନ ପାଇଁ

ଜେଜେମା କହେ ପଢିବାକୁ

ମହାଭାରତ ରାମାୟଣ 

ହୁଏତ ତୋ ସହ

ନାହିଁ ତା'ର ରକ୍ତର ସଂପର୍କ

ହେଲେ ତା ଭାବନା ସହ

ତୋର କ'ଣ ମିଶି ନଥିବ ପ୍ରାଣ ।

 

ଧନରେ ! କିଏ ବୁଝିବ ତା'ର ଦୁଃଖ  

ଜାଣେନି ତୋତେ ଜନ୍ମ ଦେଇ

ସେ ପୁଣ୍ଯ କରେ କି ପାପ 

ହେଲେ ଏତିକି ଜାଣିଥା 

ତୋ ରକ୍ତର ମା ମୁହଁରେ 

ହସ ଫୁଟେଇବାକୁ 

ତା'ର ଏଇ ଭିନ୍ନ ରୂପ 

ତୁ ତାର ସନ୍ତାନ 

ହେଲେ ସେ ତୋର ଭଡାଟିଆ ମା 

ଧନ୍ଯ ଏ ବିଜ୍ଞାନ 

ଦେଇଛି ତାକୁ ଏ ନାଆଁ ।