ଉତ୍କଳର ନେତା ସ୍ବୟଂ ନାରାୟଣ

ତୁମ ଛତ୍ର ଛାୟା ତଳେ ରହିଅଛି

ପୁଣ୍ଯ ଭୂଇଁ ମୋ ଉତ୍କଳ 

ଦୁଃଖରେ ସୁଖରେ ଭଲରେ ମନ୍ଦରେ 

ଭରୁଛ କେତେ ଯେ ବଳ ।

ରହିଅଛ ପୁଣି ତାହାରି କୋଳରେ 

ଅଦିନେ ଦେଇ ଅଭୟ 

ଧନ୍ଯ ଅଟେ ମୋ କଳିଙ୍ଗ ଦେଖୁଛି

ରୂପ ତୁମ ଶୋଭାମୟ ।

ତୁମେ ରାମ କୃଷ୍ଣ ସତ୍ୟ ସନାତନ

ଶ୍ରୀକ୍ଷେତ୍ରେ ପୁରୁଷୋତ୍ତମ

କରୁଣା ତୁମର କଳି କେ ପାରିବ

ଜୀବନର ପ୍ରିୟତମ ।

ଫରଫର ଉଡେ ନୀଳଚକ୍ରେ ନେତ

ମହିମା ତୁମର ଗାଇ

ଭରସା ଦିଏ ସେ ଯାଅରେ ଆଗେଇ

ଭୟ ନାହିଁ ଭୟ ନାହିଁ ।

ତୁମଠାରୁ ବଡ ନେତା ଅଛି କିଏ

ସ୍ବୟଂ ତୁମେ ନାରାୟଣ 

ନୀଳାଚଳ ଧାମେ ବିଜେ କରିଅଛ

ବିପଦ ତାରଣ କାରଣ  ।

ଦୟାମୟ ହରି ତୁମେତ ଆସିଛ

ହରିବାକୁ ପାପ ସଂସାରୁ  

ପ୍ରୟୋଜନ ନାହିଁ ଆଉ ତ କାହାରି 

ଯେଣୁ ତୁମେ ମହାମେରୁ ।