ଭିକାରୀ ବଢ଼େଇ ଦେଲା

ଲକ ଡାଉନ :ଜୀବନ ଶିକ୍ଷା : କବିତା -10

ଭଲା କରୋନା ଏ' ଆସିଲା ଦେଶକୁ-ଭିକାରୀ ବଢ଼େଇ ଦେଲା,

ଜୀବନଟା ଆଗ ସଂପତି ପଛରେ-ଲକ ଡାଉନ ହେଲା |

ସରକାର ଏବେ ସବୁଦେବେ ବୋଲି-ଥୋକାଏ ଛାଡ଼ନ୍ତି ରଡ଼ି,

କମ୍ପାନୀ କହୁଛି ଆମ କ୍ଷତିପାଇଁ -ଋଣ ସବୁ ଦିଅ ଛାଡ଼ି |

ବେପାରୀ କହନ୍ତି ଯେତେ କ୍ଷତିହେଲା-ପୂରଣ କରୁ ସରକାର,

ଶ୍ରମିକ କହନ୍ତି ଯେତେ ଯାହା ଅଛି-ଆମକୁ ସେ ଦରକାର |

ଟିକସକୁ ଛାଡ଼ ଭତ୍ତାକୁ ବଢ଼ାଅ- ଆଉକିଛି ଥିଲେ ଦିଅ,

କର୍ମଚାରୀମାନେ କହନ୍ତି ଆମେ ତ-ସରକାରୀ ଧର୍ମପୁଅ | 

ପ୍ରବାସୀ ଆସିଲେ ମୁଣ୍ଡବ୍ୟଥା କଲେ-ଖୋଜନ୍ତି କୁଣିଆଁ ଚର୍ଚ୍ଚା,

ରୋଗକୁ ଆଣିଲେ ଘରକୁ ଫେରିଲେ-କହିଲେଣି ଦିଅ ଖର୍ଚ୍ଚା |

ବିରୋଧୀ କହନ୍ତି ରାଜନୀତି ଖେଳି ତୁମେ ସବୁ ଅପାରଗ,

ସତେକି ସରକାର ନିମନ୍ତ୍ରଣ କରି ଆଣିଲେ ଭୂତାଣୁ ରୋଗ |

ସମସ୍ତଙ୍କ ପାଇଁ ଖାଇବା ରହିବା ମାଗଣାରେ ବାଣ୍ଟୁଥାଅ,

ଆମପାଇଁ ତୁମେ ଦେଲ ବୋଲି ଥରେ ଗରିବଙ୍କୁ କହିଦିଅ |

ଡାକ୍ତର କହନ୍ତି ସକଳ ସୁବିଧା ବୀମାକରି ରଖିଥିବ,

ପଚାଶ ଲକ୍ଷ କି' ଜୀବନର ମୂଲ୍ୟ ହିସାବ କରିକି ଦେବ |

ସାମ୍ବାଦିକ ପୁଣି କହିଲେନି ଆମେ କରୋନା ଯୋଦ୍ଧାରେ ଗଣା,

ଆମପାଇଁ କିଛି ସୁଵିଚାର କର ଖଟୁଛୁ ନେବୁ ପାଉଣା |

ଚାଷୀ କହୁଛନ୍ତି ବିକ୍ରିବଟା ନାହିଁ ଆମର ଫସଲ ଗଲା,

ଚାଷଜମି ଦେଖ ପରିବାକୁ ଦେଖ ସବୁ ପାଚିଲା ଶୁଖିଲା |

କ୍ଷତିକୁ ପୂରଣ କରୁ ସରକାର ଆମେ କେମିତି ବଞ୍ଚିବୁ ?

ଋଣଛାଡ଼ କର ନହେଲେ ଦେଖିବ ଆନ୍ଦୋଳନ କରିଦେବୁ |

ନାଚ-ଗୀତ ପାଲା ଲୋକ କହିଲେଣି-ଆମକୁ ବି କରଖୁସି,

ସାରାଦେଶ ଲୋକ ମାଗିଲେ କେଉଁଠୁ-ଆସିବ ସେ ଧନରାଶି ?