ବହି

ଜ୍ଞାନର ସେ ଗନ୍ତାଘର,

ସମାଜ କଲ୍ୟାଣେ ସଦା

ପ୍ରୟାସ ତାହାର l

ପ୍ରାଣେ ପ୍ରାଣେ ଭରିବାକୁ

ମହକ ପୁଲକ,

ହାସ୍ୟରସ କୋଳାହଳେ,

ଭାଷା, ଇତିହାସ, ଭୂଗୋଳ ଓ

ଗଣିତ ବିଜ୍ଞାନେ ପୁଣି

ଜଣା ଅଜଣାର କୁତୂହଳେ,

ଜିଜ୍ଞାସାର ଅନ୍ତରାଳେ,

ଉଦ୍ଗ୍ରୀବ ସେ ଖୋଲିବାକୁ

ସଂସାର କୁହୁକ l

ଶୁଦ୍ଧ କରେ ଆଚରଣ, ଉଚ୍ଚାରଣ

ମଣିଷର ଯାବତ ଦୁର୍ଗୁଣ,

ଊର୍ଦ୍ଧ୍ଵଗାମୀ କରେ, ଚେତନାର ସ୍ତରେ

ଫେଡ଼ି ଆବର୍ଜନା ଆସ୍ତରଣ l

ସାଜେ ପଥହୁଡା ମଣିଷର

ଚିରକାଳ ପ୍ରିୟସଖା,

ବେଳ ଅବେଳରେ ଛଡ଼େନାହିଁ ହାତ

ଦୁର୍ଦିନେ ଦିଏନି ଧୋକା l

କରେ ମନୁ ସଂଶୟ ମୋଚନ,

ଦେଇ ହିତ ଉପଦେଶ ମାନ l

ଶିଖାଏ କୌଶଳ ଭଲ ପାଇବାର

କ୍ଷଣେ ଅନୁକ୍ଷଣେ,

ଅନାବୃତ କରେ ଆଲୋକିତ ପଥ

ଜ୍ଞାନ ମଧୁ ଆହରଣେ l

ମୁଖେ ଭରେ ସଦା ବଚନ ମଧୁର,

କେ' ଅଛି ଏ ଭଵ ସାଗରେ ତା'ଭଳି

ସତ୍ୟ, ଶିବ ଓ ସୁନ୍ଦର l