ବହି

ବିଦ୍ୟାର ଭଣ୍ଡାର ଜ୍ଞାନର ସାଗର

ନାମଟି ତାହାର ବହି

ମନର ଦ୍ୱନ୍ଦକୁ ପରିଷ୍କାର କରି 

କାନେ କାନେ ଯାଏ କହି

ଅବୁଝା ଅଜଣା ଅକୁହା ଅଚିହ୍ନା 

ସବୁକୁ ଦିଏ ବୁଝେଇ 

ସିଏ ଏକା ଗୁରୁ ପଥ ପ୍ରଦର୍ଶକ 

ତାର ସରି କିଏ ହୋଇ

ସମାଜ ସଂସ୍କୃତି ପରମ୍ପରା କଥା 

ହୃଦୟେ ତାହାରି ଲେଖା 

ଅଜ୍ଞାନ ଅନ୍ଧାର ବିନାଶନ ପାଇଁ 

ଅଟେ ସିଏ ଦୀପ ଶିଖା

ଇତିହାସକୁ ସେ ହୃଦୟ ବକ୍ଷରେ 

ସାଇତି ରଖିଛି ବୋଲି 

ପୂର୍ବାପୂର୍ବ କଥା ରହିଛି ସତେଜ

ସଜଫୁଟା ଫୁଲ ଭଲି

ଜ୍ଞାନ ବଣ୍ଟନର ମାଧ୍ୟମ ହୋଇ ସେ 

ବିଦ୍ୟା ବାଣ୍ଟେ ନିରନ୍ତର

ତା ପରି ବନ୍ଧୁ ଯାହା ପାଖେ ଅଛି

ଲୋଡ଼ା ନାହିଁ କିଛି ତାର