ଭଡ଼ାଘର
ଭଡ଼ାଘର
ଛୋଟିଆ ଚାକିରୀ ମାସିକ ଦରମା ପାଉଛି ଆଠ ହଜାର
ଚାରି ହଜାର ମୁଁ ଘରଭଡ଼ା ଗଣେ ଦୁଃଖେ ଚଳାଏ ସଂସାର |
ପାଣି ବିଜୁଳିକୁ ଅଲଗା ଖରଚ ସଫେଇ ବି ତାହାପରେ
ମାସ ନପୂରୁଣୁ ଭଡ଼ା ପାଇଁ ଆସି ମାଲିକ ଜୁଲମ କରେ |
ମହଙ୍ଗା ବଜାର ପରିବାର ଭାର ନାହିଁ ଆନ ରୋଜଗାର
ବାଧ୍ୟ ହୋଇ ରାତି ଟିଉସନ କରି ପାଉଛି ଦୁଇ ହଜାର |
ଘରଣୀ ମୋହର ଭାରି ଜାଣିବାର ଚଳାଇ ନେଉଛି ଘର
ସଂସାର ଜଞ୍ଜାଳ ବନ୍ଧୁ ବାନ୍ଧବଙ୍କୁ ସମ୍ପାଦି ଯଥାସାଧ୍ୟର |
ପୁଅଝିଅଙ୍କର ପାଠ ପଢ଼ା ଭାର ଅଚିରେ ଦିଏ ତୁଲାଇ
ବିଳାସ ବ୍ୟସନ ପାର୍ଟି କି ହୋଟେଲ ଯିବାର କଳ୍ପନା ନାହିଁ |
ସିଲେଇ ମେସିନ ପକାଇଛି ଘରେ କରେ କିଛି ଉପାର୍ଜନ
ସହଧର୍ମିଣୀ ସେ ସହମର୍ମିଣୀ ସେ ମୋ ମନ ଆକାଶ ଜହ୍ନ |
ବଖରାଏ ଘର ରୋଷେଇ ସଲଗ୍ନ ଗାଧୁଆକୁ ପାଇଖାନା
ଦେଖି ନାକ ଟେକି ପଳାଇଲା ମୋର ପିଲାଦିନ ସାଙ୍ଗ ବାନା |
ବଡ଼ ଘର ଖଣ୍ଡେ ବୁଝିଲି ମୁଁ ଯାଇ ଭଡ଼ା ଯେ ଆଠ ହଜାର
ଶୁଣାଉ ଘରଣୀ ଭାଷି କଟୁ ବାଣୀ ବୋଲେ ଏ ବୋକା ବିଚାର |
ଭୁବନେଶ୍ୱରର ଏଇ ଭଡ଼ାଘର ଆମପାଇଁ ସ୍ୱର୍ଗପୁର
ପରିବାର ଘେନି ନିରାପଦେ ଅଛେ ବାନ୍ଧି ସମ୍ପର୍କ ମଧୁର |
ଘର ବଡ଼ ହେଲେ ମାନ ବଢ଼େ ନାହିଁ ମନକୁ କରାଅ ବଡ଼
କଷ୍ଟ କଲେ କୃଷ୍ଣ ମିଳିବ ନିଶ୍ଚିତ କର୍ତ୍ତବ୍ୟ ପଥରେ ବଢ଼ |