ଭାରତ ମାତା

ଧନ୍ୟ ମୋହର ଜୀବନ ଭାରତ ମାତା ସନ୍ତାନ

କେତେ ଜନ୍ମ ପୂଣ୍ୟବଳେ ଜନ୍ମ ଭାରତେ l

ଉନ୍ନତ ଯାର ସଂସ୍କୃତି ବିଶ୍ୱେ ଉଡ଼ାଏ ସୁଖ୍ୟାତି

ବାଣ୍ଟିଛି ଆଧ୍ୟାତ୍ମ ଜ୍ଞାନ ଧନ ମରତେ l

ଜାତି ଧର୍ମ ବର୍ଣ୍ଣ ହିଁ ନାହିଁ

ସଭିଙ୍କୁ ସନ୍ତାନ ମଣି ଅଛି କୋଳେଇ l

ହିମଆଳୟ ମୁକୁଟ ଶିରେ ଶୋହେ ଝଟ ଝଟ

ପୟୋଧି ପଖାଳେ ପଦାମ୍ବୁଜ ନିରତ l

ଗଙ୍ଗା ସିନ୍ଧୁ ଗୋଦାବରୀ ଯମୁନା କୃଷ୍ଣା କାବେରୀ

ବକ୍ଷେ ପ୍ରବାହିତ ବହୁ ପୂଣ୍ୟ ସରିତ l

ପ୍ଲାବନରେ ଶ୍ୟାମଳ ଶସ୍ୟ

ପ୍ରଲୋଭନ କରି ବିଶ୍ୱ ଜନ ମାନସ l

ଦେଖି ଯା ଉନ୍ନତ ଶିରି ବାହ୍ୟ ଆକ୍ରମଣ କାରି

ସହସ୍ର ବରଷ ଧନ କଲେ ଧନ ଲୁଣ୍ଠନ l

ଯବନ ହୁଣ ଆରବ ମୋଗଲ ଇଂରେଜ ସର୍ବ

ସଭ୍ୟତା ସଂସ୍କୃତି କରିଛନ୍ତି ଖଣ୍ଡନ l

ମାତ୍ର କାଳ କରାଳ ଗର୍ଭେ

ହାରି ଯାଇଛନ୍ତି ଫେରି ଭାରତୁ ସର୍ବେ l

ପାଇ ଯା ଜ୍ଞାନ କୌଶଳ ଜଗତ ଆଜି ସଫଳ

ତାର ଧ୍ବଂସ ହେତୁ ହୋଇ ବହୁ ଚେଷ୍ଟିତ

ଦିଏ ଶାନ୍ତିର ବାରତା ମୋହର ଭାରତ ମାତା

ଜାଣନ୍ତି ସରବେ ବିଶ୍ୱଗୁରୁ ଭାରତ l

ଜଗଦୀଶ ଯେଉଁ ଭୂମିରେ

ନାନାବିଧ ଅବତାରେ ଦୁଷ୍ଟ ସଂହାରେ l

ପ୍ରଣାମ ପଦ କଞ୍ଜରେ ଭକତି ପ୍ରେମ ଭାବରେ

ସନ୍ତାନ ସନ୍ତତି ତୋର ଅଟୁ ସକଳ l

ତୋହ ମାନ ରକ୍ଷା ପାଇଁ ଅକୁଣ୍ଠିତେ ପ୍ରାଣଦେଇ

ଜୀବନ ଆମର ମାତା ହେଉ ସଫଳ l

ପୂଣ୍ୟମୟୀ ଭାରତ ମାତା

ତୋ କୃପା ପ୍ରସାଦେ ଆମେ ଜଗତ ଜିତା l