ଭାରତ ଛାଡ଼ ଆନ୍ଦୋଳନ
ଭାରତ ଛାଡ଼ ଆନ୍ଦୋଳନ
ଭାରତୀୟ ସ୍ୱାଧୀନତା ସଂଗ୍ରାମର ଲୋମହର୍ଷଣକାରୀ
ଆନ୍ଦୋଳନ ତେଜି ଗାଆଁରୁ ଗାଆଁକୁ ବଢ଼େ ଆନ୍ଦୋଳନକାରୀ ।
ସରକାରୀ ଚାକିରୀକୁ ତେଜ୍ୟ କଲେ ପଦ ପଦବୀ ଛାଡ଼ିଲେ
ଅସହଯୋଗର ଅହିଂସା ମନ୍ତ୍ରରେ ଅଭିମନ୍ତ୍ରିତ ହେଲେ ।
ଲବଣ ସତ୍ୟାଗ୍ରହ ବିଶ୍ୱରେ ପକାଇ ଦେଲା ଚହଳ
ହାତ ଫାଟି ରକ୍ତ ବହିଯାଉ ପଛେ ନକରିଲେ ହଟ୍ଟଗୋଳ ।
ବୟାଳିଶ ସାଲ ଅଗଷ୍ଟ ନଅରେ ଶେଷ ନିଷ୍ପତ୍ତି ହେଲା
ଗୋରା ସରକାର ଦେଶ ଛାଡ଼ିବାକୁ ଶେଷ ଆହ୍ୱାନ ଦେଲା ।
ରାଜଗୋପାଲାଚାରୀ ନାମିତ କଲେ ହଟିଯାଅ ଗୋରା ତୁମେ
ମହାତ୍ମା ଗ୍ରହଣ କଲେ ନାହିଁ ତାକୁ ଅଶିଷ୍ଟାଚାରର ନାମେ ।
ୟୁସୁଫ ମେହେରାଲି "ଭାରତ ଛାଡ଼"ର ନାମଟି ବାଛିକି ଦେଲେ
ଗାନ୍ଧୀଜୀଙ୍କ ମନ ଛୁଇଁଲା କଥାଟି ମୋହର ତହିଁ ମାରିଲେ ।
ଭଗବାନ ଭରଷାରେ ଛାଡ଼ିଯାଅ ଆମ କଥା ସମ୍ଭାଳିବୁ
ବିଦେଶୀ ଶାସନ ତିଳେ ହେଲେ ଆଉ ବରଦାସ୍ତ ନକରିବୁ ।
ନିଆଁ ପରି ବ୍ୟାପିଗଲା ଆନ୍ଦୋଳନ ଗୋରା ହେଲେ ହରବର
ଜାଣିଲେ ଏ ଦେଶ ଶାସନ କରିବା ନୁହେଁ ସହଜ ବ୍ୟାପାର ।
ସହୀଦ ବିପ୍ଳବ ଆଜାଦ ହିନ୍ଦ ଫଉଜର ଦେଖି ଦାଉ
ଚର୍ଚ୍ଚିଲ କଲେ ଚିନ୍ତା ଭାରତର ଶାସନ ଚୁଲିକୁ ଯାଉ ।
ବିଭାଜନ ମଂଜି ବୁଣି ଭାଇ ଭାଇ ବିଭେଦ ଭରମ ଭରି
ଅଖଣ୍ଡ ଭାରତ ଖଣ୍ଡ ଖଣ୍ଡ ହେବ ଏପରି ଯୋଜନା କରି ।
ଶେଷେ ଦେଶ ଆମ ସ୍ୱାଧୀନ ହୋଇଲା ବାକି ସବୁ ଈତିହାସ
ଧରାବୁକେ ବୃହତ୍ତମ ଗଣତନ୍ତ୍ର "ବନ୍ଦେ ମାତରମ୍" ଉଚ୍ଛ୍ୱାସ ।
ଅଗଷ୍ଟ ନଅଟି ଅଗଷ୍ଟ ପନ୍ଦର ପାଇଁ ପଥ ପରିଷ୍କାର
ସ୍ମରଣୀୟ ହେଉ "ଭାରତ ଛାଡ଼" ଆନ୍ଦୋଳନ ଆପଣାର ।