ଭାରି ଗେହ୍ଲା ମୁଁ ଯେ

     ଫୁଲ ଡାକେ ମୋତେ ଆସ ମୋ ପାଇଁକି

         ପ୍ରଜାପତି ହୁଅ ଥରେ

     କହେ ଋତୁଟିଏ ସବୁଠୁ ସୁନ୍ଦର

         ଆଣିଦେବ ସିଏ ଘରେ ।। 

     ନଈ ଡାକେ ମୋତେ ଆସ ମୋ ପାଇଁକି

         ଜଳଭଉଁରୀଟେ ହୋଇ

     କହେ ସାଥେ ମିଶି ଖେଳିବ ସେ ଖେଳ

         ଦକ ଦେବ ଦୂରେ ଥୋଇ ।। 

     ଦିନମଣି ଡାକେ ଆସ ମୋ ପାଇଁକି

         ଆଲୋକ ହୋଇଯା' ଆସ

     କହେ ଆଣି ଖୁସି ଅଜାଡିବ ମୁହେଁ

         ଫୁଟାଇବ ଦରହାସ ।। 

     ଜହ୍ନ ଡାକେ ମୋତେ ଆସ ମୋ ପାଇଁକି

         ହୁଅ ପୂର୍ଣ୍ଣିମାର ରାତି

     କହେ ଦେବ ଆଣି ରୂପେଲି ଜୋଛନା

         ନାଚ ଗୀତ ଜାତି ଜାତି ।। 

     ଗଛ ଡାକି କହେ ଆସ ମୋ ପାଇଁକି

         ହୋଇଯାଅ ଗୋଟେ ପକ୍ଷୀ

     କହେ ହେବ ସାଥୀ ସାରାଜୀବନକୁ

         କୋଳରେ ଧରିବ ରଖି ।। 

     ନଭ ଡାକି କହେ ଆସ ମୋ ପାଇଁକି

         ହୋଇଯାଅ ଇନ୍ଦ୍ରଧନୁ

     କହେ ହେବ ସିଏ ଆନନ୍ଦେ ବିଭୋର

         ଦେଖି ମୋ ସୁନ୍ଦର ତନୁ ।। 

     ମାଟି ଡାକି କହେ ଆସ ମୋ ପାଇଁକି 

         ହୁଅ ତୁମେ ଟିକି ଚାରା

     କହେ ଦେବ ମୋତେ ସୁଷମ ଆହାର

         ବରଷାର ଜଳଧାରା ।। 

     ସିନିହ ଶରଧା କଥା ଇଏ ସବୁ

         ବୁଝେ ମୁହିଁ ଭଲକରି

     ଭାରି ଗେହ୍ଲା ମୁଁ ଯେ ସଭିଙ୍କ ଆଖିରେ

         ପିଲାଟିଏ ସୁନା ପରି ।।