ଭାରି ବଢ଼ିଆ ମୋ ପ୍ରିୟ ସରକାର
ଭାରି ବଢ଼ିଆ ମୋ ପ୍ରିୟ ସରକାର
ଭାରି ବଢ଼ିଆ ମୋ ପ୍ରିୟ ସର୍କାର
ଗରିବେ ଦିଅନ୍ତି ଯାହା ଦର୍କାର |
ଟଙ୍କାକେ ଦିଅନ୍ତି କିଲେ ଚାଉଳ
ପାଞ୍ଚଟି ଟଙ୍କାରେ ଭୋଜନ ଥାଳ |
ପଡ଼ି ଖଞ୍ଜିଛନ୍ତି ପରିବାରକୁ
ଯୋଗାଇଲେ ଚିନି କିରାସିନୀକୁ |
ଛତୁଆ କମଳ ଛତାକୁ ଜୋତା
ସାଇକେଲ ମଶାରିର ବ୍ୟବସ୍ଥା |
ଇନ୍ଦିରା ଆବାସ ବିଜୁଙ୍କ ପକ୍କା
କୋଠା ଦେଲେ ଗଲା ଛପର ଦକା |
ଉଜ୍ଜଳା ଗ୍ୟାସକୁ କୁଟୀର ଜ୍ୟୋତି
ପାଇପିରେ ପାଣି ଖଞ୍ଜି ଦିଅନ୍ତି |
ଶ୍ରମ କରିବା ମୋ ଯାତକେ ନାହିଁ
ଶ୍ରମିକ କାର୍ଡ ଅଛି ମୁଁ ପାଇ |
ରାସନ ସାଙ୍ଗକୁ ବିଜୁ କଲ୍ୟାଣ
ରୋଗପାଇଁ ନାହଁ ଚିନ୍ତା କାରଣ |
ପାଞ୍ଚ ଲକ୍ଷ ପ୍ରତି ପୁରୁଷ ପିଛା
ମହିଳାଙ୍କୁ ସାତ ଲକ୍ଷ ବ୍ୟବସ୍ଥା |
ଘରୁ ଦିନେ ଗୋଡ଼ କାଢ଼େନି ଯିଏ
ଘରଣୀ ଲେବର କାର୍ଡ ପାଏ |
ପାଇଲିଣି ଏବେ ବାର୍ଦ୍ଧକ୍ୟ ଭତ୍ତା
ମାସକୁ ମିଳୁଛି ପାଞ୍ଚଶ'ଟଙ୍କା |
ଭାରିଜା ମହିଳା ଭାଗବତରେ
ଭତ୍ତା ପାଉଛି ପାଳିଆ ଭାବରେ |
କଳାକାର ଭତ୍ତା ପାଉଛି ମୁହିଁ
ଗୀତ ପଦେ ବୋଲି ଆସଇନାହିଁ |
ବାଡ଼ି ଗୋବେ ଗୋବେ ବିଲ ମୋ ନାହିଁ
କାଳିଆ କିଷାନ ପାଉଛି ମୁହିଁ |
ଦିନେ ହେଲେ ଚାଷ କରିତ ନାହିଁ
ଭାଗ ଚାଷୀରେ ମୁଁ ଗଣା ହୁଅଇ |
କୃଷକ କମିଟି ସଦସ୍ୟ ମୁହିଁ
କୃଷିକାମ ମୋତେ ମାଲୁମ ନାହିଁ |
ମିଳିଛି ଦୁଇଟା ଇନ୍ଦିରାଵାସ
ପାଇଖାନା ପାଇ ହେଲି ଉଶ୍ୱାସ |
କେଡ଼େ ସୁଖ ଦେଲେ ଆମ ସର୍କାର
ବସି ଖାଇବାଟା ଭାଗ୍ୟ ଆମର |
ଜମିବାଡ଼ି ଯାର ବହଳ ଅଛି
ଖଟି ଖଟି ସିଏ ନିତି ମରୁଛି |
ମାଟି କାଦୁଅରେ ଖଟିବ କିଏ
ମିସ୍ତ୍ରୀ କାମ ଭାରି ଆନନ୍ଦ ଦିଏ |
ଦିନକୁ ମଜୁରୀ ତିନିଶ ଟଙ୍କା
ଦୁଇ ଦିନ ଖଟି ମାରଇ ଫାଙ୍କା |
ସର୍କାର ମଜୁରୀ ବଢ଼ାଉଛନ୍ତି
ଦିନେ କାମ କଲେ ଖର୍ଚ୍ଚକୁ ଅତି |
ଗୋଡ଼େ ଗୋଡ଼ ଲଦି ବସିବା ସାର
ଧନ୍ୟ ଧନ୍ୟ ପ୍ରିୟତମ ସର୍କାର |
ଭାରିଜା ମୋହର ଭାରି ଚତୁରୀ
କମିଟିରେ ଦିଏ ପଇସା ଭରି |
ପୁଅ ଦୁଇଟାକୁ ଦେଲି ପଠାଇ
ପ୍ରବାସରେ ଯାଇ ଖଟିବା ପାଇଁ |
ଝିଅ ବାହାଘର ଚିନ୍ତା ମୋ ନାହିଁ
ସୁକନ୍ୟା ଯୋଜନା ଅଛି ତା ପାଇଁ |
ଲେବର କାର୍ଡ ଦେଲେ ଦେଖାଇ
ପଚାଶ ହଜାର ମିଳିବ ତହିଁ |
ବାଇକି ଧରିକି ବୁଲଇ ମୁହିଁ
ସ୍ମାର୍ଟ ଫୋନ ହାତୁ ଛାଡ଼ଇ ନାହିଁ |
ମାଗଣା କି ଦିଅ ପ୍ରିୟ ସର୍କାର
ଭୋଟ ଖଣ୍ଡିକ ଦିଏ ମୋହର |
ଭୋଟ ମୂଲ ତ ଅମୂଲ ମୂଲ
ଯେତେଦେଲେ ହେବ ନାହିଁ ତା ତୁଲ |
ସବୁ ଯୋଗାଇଲ ପ୍ରିୟ ସର୍କାର
ଆଉ ବେନି ଚିଜ ଲୋଡ଼ା ମୋହର |
ହେଡ଼ ବକ୍ସ ଥାଇ ଖଟଟେ ଦିଅ
ଏଲ ଜି ଟି ଭି ଟେ ଘରେ ଲଗାଅ |
ଆରାମରେ ଶୋଇ ଗାଇବି ଗୀତ
କରୁଥିବି ଦେଶ ଜାତିର ହିତ |