ଭାଇ ଭାଇର ଖେଳ
ଭାଇ ଭାଇର ଖେଳ
ଏକା ମା ଠାରୁ ଜନମି ହେଲେ ସମ୍ପର୍କରେ ଭାଇ ଭାଇ,
ବଢିଲେ ଏକ ସଙ୍ଗେ ମାତା ପିତାଙ୍କର ଆଶିଷ ପାଇ l
ପିଲାଦିନ କଥା ବଡ଼ ସ୍ମରଣୀୟ, ସେ ତ ଅଭୁଲା ଅତୀତ,
ଏକ ଛାତ ତଳେ ହସି କାନ୍ଦି ଖେଳିଲେ ଧରି ହାତ l
ପାଠ ପଢା ବେଳେ, ବଡ଼ ଦିଏ ସାନକୁ ବହୁତ ବୁଝାଇ,
ବଡ଼ ଲୁହ ପୋଛିଦିଏ ଯେବେ ସାନ ଡାକିଦିଏ ଭାଇ l
ଏକ ସଙ୍ଗେ ମିଶି ବିଦ୍ୟାଳୟ ଗଲେ ବିଦ୍ୟା ଲାଭ ପାଇଁ,
ବଡ଼ ଜଗିଥାଏ ସାନକୁ ଗୋଡ଼େ ଗୋଡ଼େ ମାତାଙ୍କ ଆଦେଶ ପାଇ l
ଧୀରେ ଧୀରେ ସେ ବଡ଼ ହେଇଗଲେ ସମୟ ସଙ୍ଗେ ତାଳ ଦେଇ,
ନିଜ ନିଜ କର୍ମ କରିଗଲେ ତାଙ୍କ ଜୀବନର ଲକ୍ଷ ହାସଲ କରିବା ପାଇଁ l
ନିଜ ନିଜର କର୍ତ୍ତବ୍ୟ ବୁଝିଲେ, କାମ କରିଗଲେ,
ପିତାମାତାଙ୍କୁ ତାଙ୍କ ଦାଇତ୍ୱରୁ କିଛି ମୁକ୍ତ ବି କଲେ l
ପିତାମାତା ଯେବେ ଦେଖନ୍ତି, ଆନନ୍ଦେ ବିଭୋର ହୁଅନ୍ତି,
ଦୁଇ ଭାଇଙ୍କର ସମ୍ପର୍କକୁ ଦେଖି ଆଶିଷର ପୁଷ୍ପ ବି ଢାଳନ୍ତି l
ସମୟ ଆସିଲା, ଉଭୟଙ୍କୁ ବିବାହ ବନ୍ଧନେ ବାନ୍ଧିଲା,
ସଂସାର ଗଢିବାର ନୂତନ ଧର୍ମକୁ ଶିଖାଇଲା l
ସଂସାର ଗଢିଲେ, ପତ୍ନୀ ସନ୍ତାନ ପାଇ ଆନନ୍ଦେ ରହିଲେ,
ପିତା ମାତା ଏବେ ବୃଦ୍ଧାବସ୍ଥାରେ ପହଞ୍ଚି ଆଶାରେ ବଞ୍ଚିଲେ l
କେହି କେହି ପୁତ୍ର ନିଜ କର୍ତ୍ତବ୍ୟ ନ ଭୁଲି ସେବା କରିଗଲେ.
କେହି କେହି ପୁଣି ମାୟା ଗ୍ରାସ ହୋଇ ସ୍ୱାର୍ଥପର ହେଲେ,
ପିତା ମାତାଙ୍କୁ ନିଜ ନିଜ ମଧ୍ୟେ ଭାଗ କରିନେଲେ l
ଭୁଲିଲେ ସେ ଅତୀତର ସବୁ ସ୍ମୃତି, ଆଣିଲେ ନୂଆ ରୀତି,
କର୍ତ୍ତବ୍ୟ ପାଳନକୁ ଭାଗ ବଣ୍ଟା କଲେ ଭାବି ଏକ ସମ୍ପତ୍ତି l
ତଥାପି ପିତା ମାତା ନିରବ ରହିଲେ, ଦେଲେ ତାଙ୍କ ସମ୍ମତି,
ବିରହ ବେଦନା ବୁକୁରେ ଲୁଚାଇ ନୀରବେ ଦେଖିଲେ ପୁତ୍ରଙ୍କର ନିଷ୍ପତ୍ତି l
ସ୍ୱାର୍ଥ ବଢି ଗଲା, ତାଙ୍କ ବିବେକ ହଜିଲା, ବଢ଼ିଲା ମନର ଲାଳସା,
ଦୁଇ ଭାଇ ଏବେ ଲଢେ଼ଇ କରିଲେ, ହେଲେ ଲୋକହସା l
ପିଲାଦିନ କଥା, ରକ୍ତର ସମ୍ପର୍କ ସବୁତ ହେଲା ପର,
ଖାଲି ସ୍ଵାର୍ଥେ ଅନ୍ଧ ହୋଇ ଭାବିଲେ ମୁଁ ଓ ମୋର l
ବଡ଼ ଭୁଲିଗଲା ସାନ ପ୍ରତି ସ୍ନେହ, ସାନ ଭୁଲିଗଲା ସମ୍ମାନ,
ଘରର ସଂସ୍କାର ଭୁଲି ଯୁଝିଲେ ହୋଇ ସେମାନେ ଅଜ୍ଞାନ l
ଭୁଲିଲେ ସେମାନେ ଆସିଛନ୍ତି ଏକା, ଯିବେ ଏକା ଏକା,
ଗର୍ବ ଅହଙ୍କାର କରି ଖାଲି ଦେଉଛନ୍ତି ନିଜକୁ ଧୋକା l
ଯେତେ ଯାହା ହେଲେ ଏ ତ ଏକ ସମ୍ପର୍କର ନଦୀତୀର,
ବୃଥା ହେବ ତାଙ୍କ ସବୁ କାରନାମା କଲେ ତାକୁ ଛାରକାର l
ଦୁଃଖ ଲାଗେ ଏବେ ଦେଖି ଏ ଦୁର୍ଦ୍ଦିନର ବେଳ,
କେବେ ଅନ୍ତ ହେବ, ଏହି ଦୁନିୟାରୁ ଭାଇ ଭାଇର ଖେଳ l