Library
ବଦନାମ ଗଳି
ବଦନାମ ଗଳି
ସଂସାରେ ଏମିତି ଇଲାକା ରହିଛି
ନାଆଁ ବଦନାମ ଗଳି
ବଦନାମ ହୁଏ କେହି ବି ସେଠାକୁ
ଥରେ ମାତ୍ର ଗଲେ ଚାଲି |
ମାୟାପୁରି ପରି ଆକର୍ଷଣ ତାର
ବେପଥୁ ମନକୁ କରେ
ନଷ୍ଟପୁରୁଷ ହିଁ ଯାଏ ତ କେବଳ
ମିଥ୍ୟା ପ୍ରଲୋଭନ ଘାରେ |
ରାଣୀ ମହୁମାଛି ବେପାରର ଫନ୍ଦା
ଦେଇଛି ସେଠାରେ ଖୋଲି
ଗରାଖ ଆସିଲେ ରୂପର ପସରା
ଦେଇଥାଏ ସିଏ ମେଲି |
ନାରୀର କୋମଳ ଦେହର ପରଶେ
ଆଗନ୍ତୁକ ତୃପ୍ତ ହୁଏ
ବୁଝେନି କେବେ ସେ ନାରୀମନ ତଳେ
କେତେ ଯେ ବେଦନା ଥାଏ |
କେଉଁ ପରିସ୍ଥିତି ବାଧ୍ୟ କରିଥାଏ
ନାରୀକୁ ହେବାକୁ ସାକୀ
ଜୀବନ ଯନ୍ତ୍ରଣା ଟାଣି ଆଣିଥାଏ
ନିଜେ ନିଜ ପାଇଁ ସାକ୍ଷୀ |
କିଏ ସ୍ୱାମୀହରା କିଏ ବା ଛେଉଣ୍ଡ
ନିରାଶ୍ରୟା ଅବା କେତେ
ଅର୍ଥ ପ୍ରଲୋଭନେ ନରକ ଭୂଇଁକୁ
ପାଦ ରଖିଥାନ୍ତି ସତେ |
ଥରେ ଯିଏ ଆସେ ଆଉ ଫେରେନାହିଁ
ସମାଜ ବlଛନ୍ଦ ହୁଏ
ଅଭିଶପ୍ତା ପରି ବଞ୍ଚେ ଦୁନିଆରେ
ନରକ ଯନ୍ତ୍ରଣା ପାଏ |
ସଞ୍ଜ ନହେଉଣୁ ରୂପଚର୍ଯ୍ୟା ସରେ
ନୂତନ ଗ୍ରାହକ ପାଇଁ
ସବୁ ଯନ୍ତ୍ରଣା ଯେ ସହିବାକୁ ହୁଏ
ପ୍ରତିବାଦ କରେ ନାହିଁ |
ଅର୍ଥ ସବୁ ଲୁଟେ ରାଣୀ ମହୁମାଛି
ଲାଂଛନା ବି ମିଳେ କେତେ
କେଉଁ ପୁରୁଷ ବି ବୁଝିନାହିଁ କେବେ
ଆସନ୍ତି ବି ଯେତେ ଯେତେ |
ସୁରା ଆଉ ସାକୀ ମାୟାପୁରୀ ସେତ
କଳଙ୍କିତ ଏକ ସ୍ଥାନ
ବଦନାମ ଗଳି କୁହୁକ ପରାୟେ
ନଷ୍ଟେ କରେ ପ୍ରଲୋଭନ |
