ଭାଗବତ ଭଜନ ମାଳା

  ଭାଗବତ ଭଜନ ମାଳା l

ଭବାବ୍ଧୀ ତାରଣ କାରଣ ଭେଳା l

  ଭାଗବତ ଭଜନ ମାଳା ...

ପ୍ରଥମ ଦ୍ୱିତୀୟ ନଈମିଷାରଣ୍ୟେ 

ସାଧୁ ସନ୍ଥଙ୍କର ମେଳା ବସିଲା l

ସୂତ ଶୋଊନକ ମିଳିଲେ ଅନେକ 

 ଆଗମ ନିଗମ ବଖାଣ ହେଲା l

  ଭାଗବତ ଭଜନ ମାଳା ...

ତୃତୀୟରେ ପୁଣି ବ୍ରହ୍ମାଣ୍ଡ ସର୍ଜନା 

ଚତୁର୍ଥରେ ଧ୍ରୁବ ତପେ ବସିଲା l

ଅଜପା ମନ୍ତ୍ରକୁ ହୃଦୟରେ ଧ୍ୟାୟୀ 

ଧ୍ରୁବଲୋକେ ପୁଣି ସ୍ଥାନ ଲଭିଲା ll

  ଭାଗବତ ଭଜନ ମାଳା ...

ପଞ୍ଚମ ସ୍କନ୍ଧରେ ସାତ ଭାଗେ ପୃଥ୍ବୀ 

ଭରତ ପୁତ୍ରଙ୍କ ମଧ୍ୟେ ବାଣ୍ଟିଲା l

 ଛବିଶ ଅଧ୍ୟାରେ ନରକ ବର୍ଣ୍ଣନ

ପରମସଂହିତା ଶେଷ ହୋଇଲା ll

   ଭାଗବତ ଭଜନ ମାଳା ...

ଷଷ୍ଠରେ ତାରଣ ପାପୀ ଅଜାମ୍ବିଳ

ପୁତ୍ର ନାମେ ନାରାୟଣ ଡାକିଲା l

ତରିଗଲା ପାପୀ ପୁତ୍ରନାମ ଡାକି 

ଅଦଭୁତ ଅଟେ ହରିଙ୍କ ଲୀଳା ll

  ଭାଗବତ ଭଜନ ମାଳା ...

ସପ୍ତମ ସ୍କନ୍ଦରେ ମହା ବିଷ୍ଣୁ ଭକ୍ତ 

ପ୍ରହଲ୍ଲାଦଙ୍କର ଜନ୍ମ ହୋଇଲା l

ହିରଣ୍ୟ ବିଦାରି ପ୍ରଭୁ ନରହରି 

ଅନ୍ତରେ ପିନ୍ଧନ୍ତି ଗଳାରେ

Advertisement

ମାଳା ll

  ଭାଗବତ ଭଜନ ମାଳା ...

ଅଷ୍ଟମ ସ୍କନ୍ଦରେ ସାଗର ମନ୍ଥନେ 

ଜନମ ଲଭିଲେ ମାଆ କମଳା l

ଗଜ ଉଦ୍ଧାରଣ କୁମ୍ଭୀର ମାରଣ 

ମୋହିନୀମାୟାରେ ଶିବ ବାଉଳା ll

  ଭାଗବତ ଭଜନ ମାଳା ...

ନବମ ସ୍କନ୍ଦରେ ବଂଶାନୁଚରିତ 

ଚଉଦ ଅଧ୍ୟାୟେ ସମାପ୍ତ ହେଲା l

ଦଶମ ସ୍କନ୍ଧରେ ଶ୍ରୀହରି ଜନମ 

ମଞ୍ଚାରୁ ମଉଳା ପଡ଼ି ମରିଲା ll

 ଭାଗବତ ଭଜନ ମାଳା ...

ଏକାଦଶ ସ୍କନ୍ଦେ ତତ୍ତ୍ୱର ବଖାଣ 

ଉଦ୍ଧବ ବଦ୍ରିକାଶ୍ରମେ ଚଳିଲା l

ଯେଉଁ ଦାଣ୍ଡେ ଗଲେ ଭକତ ଉଦ୍ଧବ 

ସେ ଧୂଳି ମୋହର ମୁଣ୍ଡେ ପଡ଼ିଲା ll

  ଭାଗବତ ଭଜନ ମାଳା...

ଦ୍ଵାଦଶ ସ୍କନ୍ଦରେ ଭବିଷ୍ୟ କଥନ 

ଶୁକ ମୁଖେ ପରୀକ୍ଷିତ ଶୁଣିଲା l 

କରି ହରିଧ୍ୱନୀ ଗଲେ ଶୁକମୁନି 

ଜନ୍ମେଜୟ ସର୍ପ ଯଜ୍ଞ କରିଲା ll

  ଭାଗବତ ଭଜନ ମାଳା ...

ଦ୍ବାଦଶ ସ୍କନ୍ଧରେ ଶିରି ଭାଗବତ 

ଭଜ ଆରେ ମନ ନକରି ହେଳା l

ଅଭ୍ୟାସିବ ନିତ୍ୟ ଏ ପରମ ଶାସ୍ତ୍ର 

ଜଗନ୍ନାଥ ଦାସ ଗୀତେ କହିଲା ll

   ଭାଗବତ ଭଜନ ମାଳା ...