ଭାବୁଥିଲି

ତୁମ ରାଗ ତମତମ ଚାହାଣିକୁ

ଆଉ ଟିକେ ଚିଡ଼େଇବି ଭାବୁଥିଲି

ତୁମେ ଫେରି ଚାଲି ଯାଉଥିଲ ଯେବେ

ତୁମ ବାଟ ଓଗାଳିବି ଭାବୁଥିଲି।

ତୁମେ ରାଗିଗଲ ତୁମ ଗୋରା ଗାଲ

ଫିକା ଗୋଲାପୀ ଗୋଲାପୀ ଦିଶୁଥିଲା

ରୁହ୍-ଅଵଜା ଟିକେ ଠିପି ଖୋଲିଦେଇ

ଢୋକେ ପିଇବି ବୋଲି ମୁଁ ଭାବୁଥିଲି।

ବୋତଲର ମୁହଁ ତଥାପି ଶୋଷିଆ

ମଦ ବୋତଲରେ କେବେ ଗିଲାସ ରେ

ଖାଲି ନିଗିଡିବା ବେଳ ଦୁଇ ଘଡ଼ି ବୋଲି

ନ ସରନ୍ତା ଏ ବେଳ ମୁଁ ଭାବୁଥିଲି।

ତୁମେ ଯାଉଥିଲ ତୁମ ପଣତ ଟା

ମୋ ମୁହଁ ପାଶେ ଘଷି ଖସିଗଲା

ନେସି ଦେଇଗଲା ମେଞ୍ଚେ କଞ୍ଚା ନିଶା

ଭିଡି ଧରିବାକୁ ଖାଲି ଭାବୁଥିଲି।

ମୁଁ ଦେଖୁଥିଲି ତୁମ ଯିବା ବାଟ

ତୁମେ ଲେଉଟି ଚାହିଁଲ ଯାଉଯାଉ

ଏ ତ ରାଗ ନୁହଁ ଥିଲା ଅଭିମାନ

ବସି ବସି ମନେମନେ ଭାବୁଥିଲି।