ଭାବନାର କ୍ଷେତ୍ରଫଳ

ଭାବନାର କ୍ଷେତ୍ରଫଳ ତ ନଥାଏ

ନଥାଏ ତା ପରିସୀମା,

କେତେ ଦୂର ଦୂର ଭାବନାର ଗତି

 ମାପି ହୁଏନାହିଁ ଜମା ll

ନିମିଷକେ ସିଏ ଲଙ୍ଘି ଯାଇପାରେ

ସପ୍ତ ସିନ୍ଧୁ ଜଳ ଭାଗ,

ଭୂଭାଗୁ ଆକାଶ ଅନ୍ତରୀକ୍ଷ ଯାଏ 

ଗତି ତାର ଚତୁଃର୍ଦିଗ l

ବାନ୍ଧିହୁଏ ନାହିଁ ଭାବନାଟି ସେତ

ଗୋଟିଏ ଭାବକୁ ନେଇ,

ଭାବନା ରାଇଜେ ବୁଲୁଥାଏ ସଦା

ମୁକ୍ତ ବିହଙ୍ଗମ ହୋଇ l

ଗୋଟିଏ ଦିଗରେ ଭାବନାରୋକିଲେ

ଅନ୍ୟ ଦିଗେ ଯାଏ ମାଡି,

ବ୍ୟାପକ ଯୋଜନା ମୁହୂର୍ତ୍ତେ ମଧ୍ୟରେ

ହୋଇଯାଇଥାଏ ଯୋଡି l

କେବେ ଉଡ଼ିଯାଏ ଚନ୍ଦ୍ରମା ପୃଷ୍ଠକୁ

ମନଯାନ ପରେ ବସି,

କେବେ ବୁଲିଯାଏ ଚଉଦ ଭୁବନ

ଗୟା ଗଙ୍ଗା ଆଉ କାଶୀ l

ଆୟତ୍ତ କରିବା ଅତୀବ କଠିନ

ମଦ ମତ୍ତ ହସ୍ତୀ ଯଥା,

ବିବେକ ବଳରେ ଆୟତ୍ତ କରିବା

ଉଚିତ ଅଟେ ସର୍ବଥା l

ଆତ୍ମ ବିଶ୍ୱାସ ଓ ସଂଯମତା ବଳେ 

ବିବେକକୁ ଦୃଢ଼ କରି,

ଭାବନାକୁ ସତ ପଥେ ନେଇ ଚାଲ 

ଉନ୍ନତି ମାର୍ଗକୁ ଧରି l

ଭାବନାଟି ଯଦି ସୁପଥରେ ଯାଏ

ସୌରଭ ବାଣ୍ଟଇ ତାର,

କୁପଥରେ ଗତି କରିଲେ ଭାବନା 

ମାନବଟି ନାରଖାର l

ଆଧ୍ୟାତ୍ମଭାବନା ଦିବ୍ୟତା ଭାବନା

ଈଶ୍ୱର ନିକଟେ ଗତି,

ପରମାର୍ଥ ମିଳେ ମୁକ୍ତି ମାର୍ଗ ଖୋଲେ 

ମିଳି ଥାଏ ଗତି ମୁକ୍ତି l