ଭାବନାର କ୍ଷେତ୍ରଫଳ

ଅସୀମିତ ବ୍ୟାପ୍ତ ଭାବନା ପରିଧି

ଅମାପ ତା କ୍ଷେତ୍ରଫଳ 

ପାରେ ଅତିକ୍ରମି ପ୍ରଖର ବେଗରେ

ତିନିପୁର ଭୂମଣ୍ଡଳ ।

ଶୂନ୍ଯ ଅଣାକାର ସ୍ବରୂପ ତାହାର

ଶକତି ଅକଳ୍ପନୀୟ 

ମାନେ ନାହିଁ କିଛି ବାଧା ପ୍ରତିବନ୍ଧ

ଶିକୁଳୀ ପିଞ୍ଜରା ଦେହ ।

କର୍ମ ସଦ୍ଭାବନା ଉତ୍ତମ ସଂସ୍କାର 

ସଚେତନ ସୁସାହିତ୍ଯ 

ପ୍ରକଟେ ଭାବନା ସୁମନ ମହକ

ପ୍ରସ୍ଫୁଟଇ ପାରିଜାତ ।

ହୃଦ ସହସ୍ରାର ଚକ୍ର ଅନାହତ

ବିଶୁଦ୍ଧାଦି ମଣିପୁର 

ଉନ୍ମେଷେ କଳ୍ପନା ପ୍ରଫୁଲ୍ଲ କମଳ

ସତ୍ଯ ଶାନ୍ତି ଶତଦଳ ।

ସମ୍ଭବଇ ସୃଷ୍ଟି ସବୁଜ ସୁନ୍ଦର 

ପ୍ରବହେ ମୃଦୁ ମଳୟ

ନିର୍ଝରେ ଅମୃତ ମରତ ଲୋକରେ

ପ୍ରାଣ ହୁଏ ଜୀବନ୍ମୟ ।

ଅନ୍ବେଷେ ଜୀବନ ଆନନ୍ଦ ଉଲ୍ଲାସ 

ମଧୁମୟ ସ୍ନେହ ପ୍ରେମ

ବିକଶେ ଭାବନା ଜ୍ଯୋତି ବର୍ଣ୍ଣ ବିଭା

ଦିଗନ୍ତ ନବ ସ୍ବଣ୍ଣିମ ।