ବୈଶାଖି ଝଡ଼

ବୈଶାଖି ଖରା ତାତିଗଲା ପରା,

ବାଟଘାଟ ବିଲ ପଡ଼ିଆ

ମିଳିଲାନି ପାଣି ଶୁଖିଗଲା ସବୁ,

ନଈନାଳ, କୂଅ ଗାଡ଼ିଆ ।

ଥକା ମାରିବସେ ବାଟୋଇ ଭାଇଟି,

ଝଙ୍କା ବରଗଛ ମୂଳେ

ପାଣିଟିକେ ପାଇଁ ରହିଥାନ୍ତି ଚାହିଁ,

ଗୋମୁମାନେ ନଈକୂଳେ ।

ଶୋଷେ ଛଟପଟ ପଶୁପକ୍ଷୀ ମାନେ,

ଖରାରେ ହେଲେଣି ହତାଶ

ଉପରବେଳାରେ ଦାଉ ସାଧୁଥାଏ,

କାହୁଁ ଆସି ବୈଶାଖି ବତାଶ ।

ପାଦ ପୋଡ଼ିଯାଏ ନଈ ବାଲିରେତ,

ନିଛାଟିଆ ଖରାବେଳରେ

ଖେଳେ ମାତିଥାନ୍ତି ତଥାପି ପିଲାଏ,

ତୋଟା ତଳେ ସାଥି ମେଳରେ ।

ଭଲଲାଗେ ଭାରି ଥଣ୍ଡାପାଣି,

ଲସି, କାକୁଡ଼ି, ତରଭୂଜ, ଦହି ପଖାଳ

ଭଲ ଲାଗ ନାହିଁ ତାତିପାଇଁ ରାତି,

ଦିନ ଅବା ସଞ୍ଜ ସକାଳ ।

ଖାଇବା ପିଇବା ଶୋଇବା ରହିବା,

କେଉଁଥିରେ ଶାନ୍ତି ନାହିଁତ

ବୈଶାଖି ଖରା ଖରାପ ଲାଗଇ,

ଏହି କେତେ କଥା ପାଇଁତ ।