Library
ବାଟ
ବାଟ
ଏନ୍ତୁଡ଼ିରେ ଜନମିଲା ପରେ କାନ୍ଦିବାକୁ ହୁଏ
ମଶାଣିର ମାଟି ଯାଏ ବାଟ ଚାଲିବାକୁ ହୁଏ ।
କିଏ ଜାଣେ କାହା ଲୁହ କାହାପାଇଁ ବହେ
ହସଟିକେ ପାଇଁ କଣ୍ଟାବାଟ ଚାଲିବାକୁ ହୁଏ ।
ବିଶ୍ୱାସର ରାଜପଥେ ଅବିଶ୍ୱାସ ଥାଏ ଲୁଚି
ବିବେକ ହାରିଲେ ବୁଦ୍ଧି ପରା ଅବାଟେ ନିଏ ।
ତ୍ୟାଗର ବି ଥାଏ ସୀମା ଟପିଲେ ହୁଏ ବିଷ
ମନ ଘା' ଲୁଚାଇଲେ ଜୀବନେ କର୍କଟ ହୁଏ ।
ଲାଗିପାରେ କଟୁକଥା ତଥାପି ରଖିଥା ମନେ
ମା' ସ୍ନେହରେ ହେଲେ ଅନ୍ଧ, ପିଲା ନଷ୍ଟ ହୁଏ ।
ଯେବେ ପିତାମାତା କଥାସବୁ ବିଷପରି ଲାଗେ
ଜାଣିରଖ ସେବେ ତୁମପାଦ ଅବାଟରେ ଥାଏ ।
ତର୍ଜମା କରିବା ଶିଖ ଜୀବନର ପ୍ରତି କ୍ଷଣେ
ମଣିଷକୁ ବୁଝିବା କଷ୍ଟ ସମ୍ପର୍କ କଷିବାକୁ ହୁଏ ।
ସତମିଛରେ ସମ୍ପର୍କ ଚାଲୁଅଛି ସମାଜରେ ପରା
ବୁଦ୍ଧି ଲଗାଇ ମଣିଷ ଅଭିନୟକୁ ଚିହ୍ନିବାକୁ ହୁଏ ।
ଦାନ୍ତ ଯଦି ପୋକଲାଗେ ମୁଖରୁ କାଢିବା ଜରୁରୀ
ଯେଉଁବାଟ ମରଣକୁ ସେହି ବାଟ ଭୁଲିବାକୁ ହୁଏ ।
ସନ୍ଦେହ ଟା ହୋଇପାରେ ଭୁଲ୍ ସମ୍ପର୍କ ମଧ୍ଯରେ
ସତର୍କତା ନିତାନ୍ତ ଜରୁରୀ ଏହା ପାଳିବାକୁ ହୁଏ ।
ସମ୍ପର୍କର ଗୁଢ଼ କଥାଟିଏ ମନେରଖ ସବୁ ମଣିଷ
ଅସମ୍ମାନ ହୁଏ ଯଦି, ସେ ବାଟ ଛାଡ଼ିବାକୁ ହୁଏ।
