ବାଲି ତୃତୀୟା

ଭାଦ୍ର ଶୁକ୍ଲପକ୍ଷ ତୃତୀୟା ତିଥିରେ

ଯାଇ ନିଘଞ୍ଚ କାନନ,

ଦକ୍ଷ ରାଜ-କନ୍ୟା ବାଲି ଲିଙ୍ଗ ଗଢି

ପୁଜିଥିଲେ ତ୍ରିନୟନ । [୧]

"ବିରୁପାକ୍ଷ, ହର, ସ୍ୱୟଂମ୍ଭୁ ,ଶଙ୍କର,

ଶିବ, ପ୍ରଥମ ଈଶ୍ବର,

ସିଦ୍ଧନାଥ; ବାଣେଶ୍ୱର, ଲୋକନାଥ,

ବିଶ୍ୱେଶ୍ୱର, ଯୋଗେଶ୍ୱର। [୨]

ଚନ୍ଦ୍ରଚୂଡ଼, ଗଙ୍ଗାଧର, ଶମ୍ଭୁନାଥ,

କୃତିବାସ, ଲୋକନାଥ,

ପରଂବ୍ରହ୍ମ, ନୀଳକଣ୍ଠ , ଦିଗମ୍ବର,

ରୁଦ୍ରେଶ୍ୱର, ଭୂତନାଥ । [୩]

ପାଞ୍ଚିଛନ୍ତି ତାତ, ବିଷ୍ଣୁଙ୍କର ସାଥେ

ରଚିବାକୁ ପରିଣୟ ,

କୁହ କିପରି ମୁଁ ଆନର ହୋଇବି

ଦେଇ ତୁମକୁ ହୃଦୟ ? [୪]

କାମିନୀ-କାଞ୍ଚନ ବିରାଗୀ ଯୋଗୀ ହେ!

ତୁମରି ସଂଯୋଗ ହେଜି,

ବିଳାଶ-ବ୍ୟସନ, କାମନାର ସୁଖ,

ସବୁ ଦେଇଅଛି ତେଜି । [୫]

ଆହେ ମହାଯତି! ତୁମରି ସ୍ୱତନ୍ତ୍ର-

ବିଶେଷ ଗୁଣର ଲାଗି ,

ତୁମ ଜୀବନରେ ଏକଇ ରମଣୀ

ହେବାକୁ ଚାହେଁ ଅଭାଗୀ। [୬]

କାୟା ମନୋବାକ୍ୟେ, ଛାଇ ହୋଇ ପାଶେ

ରହିବି ମୁଁ ଯୁଗ ଯୁଗ ,

ଅନୁଗ୍ରହେ ପ୍ରଭୁ ଏ ଦାସୀର ଭର୍ତ୍ତା-

ହେବାର ମିଳୁ ସୁଯୋଗ । [୭]

ଇଚ୍ଛାମୟ ଶିବ, ସର୍ବଜ୍ଞ ପୁରୁଷ,

ଶରଣ ରକ୍ଷଣ ଦାତା,

ଅକର୍ମ ଦାନି ହେ! ଭୋଳା ମହେଶ୍ୱର

ପରିତ୍ରାଣର କରତା । [୮]

ଅସାର ଜୀବନ ତୁମ ଶ୍ରୀପୟରେ

କରିଅଛି ସମର୍ପଣ,

ଅନୁଗ୍ରହ ବିନା ଅର୍ଣ୍ଣ ଛୁଇଁବିନି

ଗଲେ ଯାଉ ଏ ଜୀବନ। " [୯]

ଆତ୍ମିକ ଭକ୍ତିରେ କୈଳାଶ କମ୍ପିଲା

ତୋଷ ହେଲେ ବାବା ହର,

ବିବାହ ବନ୍ଧନେ ଛନ୍ଦି ହୋଇ ଯୋଗୀ

ଗଢିଲେ ସୁଖୀ ସଂସାର । [୧୦]

ଶକତି ସହିତ ଈଶ୍ବର ରହିଲେ

ଅର୍ଦ୍ଧ ନାରୀଶ୍ୱର ହୋଇ ,

ବାଲି ତୃତୀୟାର କିମ୍ବଦନ୍ତୀ କଥା

ଈଶ୍ବର, ସତୀଙ୍କୁ ନେଇ । [୧୧]