ଅଟଳ ପ୍ରତିଜ୍ଞା
ଅଟଳ ପ୍ରତିଜ୍ଞା
ବତାସ ପ୍ରଭାବେ ପ୍ରଶାନ୍ତ ବକ୍ଷରେ
ଜୁଆର ଯେସନ ଜାଗେ
ପ୍ରତିଶୋଧାନଳେ କମ୍ପମାନ ପ୍ରାୟେ
ସମଗ୍ର ଶରୀର ଲାଗେ
ଆପାଦମସ୍ତକ ରକ୍ତାଭ ବର୍ଣ୍ଣରେ
ବାଳରବି ଜ୍ବାଳା ବୋଧ
ପ୍ରଳୟ ହେବ କି ମହାକାଳ ମୁଖେ
ଏକ୍ଷଣି ଭରିଛି କ୍ରୋଧ
ନେତ୍ର ଯୁଗଳରେ ଉଦାର ପଟଳ
ଅସ୍ଥିର ବିଷମ ଚାପେ
ଭସ୍ମୀଭୂତ କିବା ହେବ ବସୁନ୍ଧରା
ଏ ରୋଷ-ଡହକ ତାପେ
ଅରୁଣିମା ମିତ୍ର ଅନଳ ସତେକି
ଖେଳଇ ଲହରୀ ମାଳେ
ଶୋକାଶ୍ରୁ ଜଳ ବି ନୟନସାଗରେ
ଜଳିଯାଏ ସମକାଳେ
ସଂସାର ସମ୍ମୁଖେ ଅଟଳ ପ୍ରତିଜ୍ଞା
କରିଗଲେ ଧନଞ୍ଜୟ
କଥା ଅନୁସାରେ ଯଥାର୍ଥ କାର୍ଯ୍ୟକୁ
ନକରି ହେବେନି ଥୟ
ଅବୋଧ ବାଳର ହତ୍ଯା କଲେ ଯିଏ
କପଟ ବ୍ୟୂହର ପର୍ବେ
ଶୋକମଗ୍ନ ହେବେ ସତ୍ବରେ ବିଧର୍ମୀ
ପାମର ଶତ୍ରୁ ସେ' ସର୍ବେ
ଅଭିମନ୍ୟୁ ଧନ ନିଧନ କାରଣେ
ଥିଲେ ଯେଉଁ ରଥୀ ମୂଳ
ଅଚିରେ ସଭିଙ୍କ ନିର୍ଦ୍ଦୟ ହୃଦୟେ
ଭେଦିବ ନିଶ୍ଚୟ ଶୂଳ
ଖଳ ଜୟଦ୍ରଥ ନିମନ୍ତେ ଏବେ ତ
ମୃତ୍ୟୁଦଣ୍ଡ ମାତ୍ର ସାର
ପାର୍ଥ ସାଥେ ଯୁଝି ବରଣ କରୁ ସେ'
ରୌରବ ନରକ ଦ୍ବାର
ରଣକ୍ଷେତ୍ରେ କାଲି ପଣ ନରହିଲେ
ଶସ୍ତ୍ରାସ୍ତ୍ର ସକଳ ତ୍ୟାଗି
ଧନୁର୍ଦ୍ଧର ବୀର ସତ୍ୟ ସଙ୍କଳ୍ପିଲେ
ହୋଇଯିବେ ବଇରାଗୀ
ସୂର୍ଯ୍ୟାସ୍ତ ପୂର୍ବରୁ ଜୟଦ୍ରଥ ବଧ
ଅଟଳ ପ୍ରତିଜ୍ଞା ଯହିଁ
ସାକ୍ଷୀ ରହିଥିଲେ ଦଶ ଦିଗପାଳ
ଅନଳ ଅମ୍ବର ମହୀ