ଅତିଥି

ଭାରତୀୟ ସଂସ୍କୃତିରେ ଅତିଥି ମହାନ

ଅତିଥି ଗୃହସ୍ଥ ପକ୍ଷେ ଦେବତା ସମାନ |

ଅତିଥିଙ୍କୁ କରାଯାଇ ଥାଏ ନିମନ୍ତ୍ରଣ

ବିନା ନିମନ୍ତ୍ରଣେ ଯାର ହୁଏ ଆଗମନ |

ବିନା ତିଥିରେ ସେ କରିଥାନ୍ତି ପଦାର୍ପଣ

ତେଣୁ ସେ ଶ୍ରେଷ୍ଠ ଅତିଥି ମଧ୍ୟରେ ଗଣନ |

ଅତିଥିର ସେବା ଚର୍ଚ୍ଚା ଗୃହୀର କର୍ତ୍ତବ୍ୟ

ଅତିଥି ତୋଷରେ ତୋଷ ହୁଅନ୍ତି ମାଧବ |

ଯାହା ଘରୁ ଅତିଥି ନିରାଶେ ବାହୁଡ଼ନ୍ତି

ସକଳ ସୁକୃତି ତାର ହୁଅଇ ଦୁର୍ଗତି |

ସେ ଘରୁ ପିତୃ ଦେବତା ହୁଅନ୍ତି ଅନ୍ତର

କୁମ୍ଭୀପାକ ନରକରେ ପଡ଼େ ସେହି ନର |

ଅତିଥି ଆସିଲେ ଆଗେ ଧୋଇଦେବ ପଦ

ଆସନରେ ବସାଇବ କରି ସ୍ନେହାସ୍ପଦ |

କୁଶଳ ବାର୍ତ୍ତା ପୁଛିବ ଦେବଟି ଭୋଜନ

ବିଶ୍ରାମ ନିମିତ୍ତ ଆବଶ୍ୟକ ଆୟୋଜନ |

ଯେତେ ଦିନ ତାଙ୍କ ଇଚ୍ଛା ରହନ୍ତୁ ସେ ଘରେ

ବିଦା ହୁଅ ବୋଲି କେବେ ନକୁହ ମୁଖରେ |

ନିଜର ଅଭାବ ଅତିଥିରେ ନ ଜଣାଇ

ସାଧ୍ୟମତେ ଚର୍ଚ୍ଚା କଲେ କୋଟି ପୂଣ୍ୟ ପାଇ |

ଅତିଥି ବିଦାୟ ବେଳେ ମଧୁ ସମ୍ଭାଷଣେ

କିଛି ବାଟ ଵାଟେଇବ ଭାବ ସମର୍ପଣେ |

ଉତ୍କଳର ଆତିଥ୍ୟଟି ଜଗତ ବିଦିତ

ବିଶ୍ୱ ମାନବିକତାକୁ କରେ ପ୍ରଭାବିତ |