ଅତୀତର ସ୍ମୃତି
ଅତୀତର ସ୍ମୃତି
ଶୀତରାଣୀ ଆଗମନେ
ହସଇ ଧରଣୀ ରାଣୀ,
ପହିଲି ପରଶ ଦିଏ
କାକର ଟୋପାର ପାଣି।
କାର୍ତ୍ତିକର ପୂଣ୍ଯ ବ୍ରତ
ତନୁମନେ ଆଣେ ଶାନ୍ତି,
ମାର୍ଗଶୀର ଲକ୍ଷ୍ମୀ ବ୍ରତ
ଭରିଦିଏ ଗୃହେ ଶକ୍ତି ।
ଶିକ୍ତ ପାଖୁଡାରେ ଥାଏ
ଶିଶିର ବିନ୍ଦୁ ବାସନା,
ମୁକ୍ତାର ଭ୍ରମ ଭରଇ
ମନେ ଆଣେ ଉନ୍ମାଦନା ।
ରାତ୍ରି ନିଦ୍ରା ଦିଏ ସୁଖ
କମ୍ବଳ ପରଶ ପାଇ ,
ପହିଲି ସୁରଜ ଆସେ
ସୁଖ ସମୃଦ୍ଧିକୁ ନେଇ ।
ମନ ଖୋଜେ ଅଗ୍ନିଶିଖା
ଶୀତରୁ ଉଦ୍ଧାର ପାଇଁ ,
ପରିବା ଫଳାଏ ଶୀତ
କ୍ଷେତରେ ଧାନ ଭରଇ ।
ଅତୀତର ସ୍ମୃତି ନେଇ
ଆସିଛି ଶୀତ ଲହରୀ ।
ହୃଦୟେ ଭରଇ ଖୁସି
ସୁଖ ଦୁଃଖକୁ ଆଦରି ।