ലൈബ്രറി
പ്രൊഫൈൽ
🥀ଅତୀତ କି ଫେରି ଆସେ 🥀
🥀ଅତୀତ କି ଫେରି ଆସେ 🥀
ବୋହି ଗଲା ପାଣି ତୁଣ୍ଡୁ ଖସା ବାଣୀ
ଅତୀତର ଦିନ ପୁଣି
ଫେରି ଆସେ ନାହିଁ ଯେତେ ଯେ ଖୋଜଇ
ଏହା ତ ଶାସ୍ତ୍ରର ବାଣୀ ।
ଆଗତ ଭବିଷ୍ୟ ଦେଖିନି କିଏ ତ
ଅତୀତ ଅଙ୍ଗେ ଲିଭାଏ
ଭୋଗେ ବର୍ତ୍ତମାନ ପଥେ ଏ ଜୀବନ
ବର୍ତ୍ତମାନ ଶ୍ରେଷ୍ଠ ହୁଏ ।
କରିବାର ଅଛି ଯାହା ମନେ ପାଞ୍ଚି
ବର୍ତ୍ତମାନ କରି ନିଅ
ଭବିଷ୍ୟତ ଆଶା କରଇ ନିରାଶା
ଦେଖିଛ କିଏ ବା କୁହ ।
ଅତୀତର ଦିନ ଭୋଗିଛି ଜୀବନ
କେତେ ଦୁଃଖ କେତେ ସୁଖ
ଅତୀତର ସ୍ମୃତି ରଖେ ସେ ସାଇତି
ମନେ ଭାବି ଲାଗେ ଦୁଃଖ ।
ଫେରି ଆସନ୍ତାକି ଅତୀତ ବେଳଟି
ହୋଇଯାନ୍ତି ଛୋଟ ପିଲା
ମାଆ ପଣତରେ ମୁହଁ ଲୁଚାଇରେ
ଖେଳୁ ଥାନ୍ତି ଦିନ ସାରା ।
ଫେରି ଆସନ୍ତାକି ସେହି ଚାଟଶାଳି
କେତେ ସାଙ୍ଗ ସାଥି ମେଳେ
ଗୁରୁଜୀଙ୍କ ପାଠ ବେତ ନତ ନତ
ଶୁଖିଯାଏ ରକ୍ତ ପଳେ ।
ଯୁବା ବୟସରେ ରଙ୍ଗୀନ ସାଗରେ
ପହଁରୁ ଥିଲି ମୁଁ କେତେ
ମନେ ପଡିଗଲେ ସେହି ସ୍ମୃତି ଥରେ
ଭାବେ ଯୁବକଟି ସତେ ।
ହଜାଇ ଦେଇଛି ଅତୀତର ସ୍ମୃତି
ମୋର ପିତା ମାତା ସିଏ
ଖୋଜିଲେ ଯେଉଁଠି ପାଏନି କେଉଁଠି
ଆଣି ଦେବ ତାଙ୍କୁ କିଏ ।
କେତେ ଯେ ଘଟଣା ଆଉ ଦୁର୍ଘଟଣା
ଘଟି ଯାଇଛି ଅତୀତେ
କ୍ଷଣେ ଭାଳି ମନ ନବ ଉନ୍ମାଦନ
ସଞ୍ଚାରିତ ହୁଏ ଚିତ୍ତେ ।
ଫେରି ନାହିଁ କେବେ ଅତୀତ ଏ ଭବେ
ସ୍ମୃତି ଏକା ତାର ଝୁରେ
ସେହି ସ୍ମୃତି ଭାଳି ଦେଉଥିବା ଭରି
ସୁଖ ଦୁଃଖ ଜୀବନରେ ।
