ଅତି ରୁ ଇତି

ଅତି ଚଗଲା ହେବାଟା ପିଲେ

ନୁହଁଇ ଭଲ ଗତି

ଅତି ଖରାପ ଅଟଇ ପରା

ଅତିର ପରିଣତି ।

ଆବଶ୍ୟକଠୁ ଅତି ଖାଇଲେ

ଭାରି ଲାଗଇ ପେଟ

ଅତି ପଢ଼ିଲେ ମନେ ରହେନି

ବିରକ୍ତ ହୁଏ ଚାଟ ।

ଅତି ଚିପୁଡ଼ି ଲେମ୍ବୁ ଚାଖିଲେ

ପିତା ଲାଗଇ ପାଟି

କାହା ସାଥିରେ ଅତି ମିଶିଲେ

ସମ୍ପର୍କ ଯାଏ ତୁଟି ।

ଅଧିକ ମିଠା ଖାଇଲେ ହୁଏ

ରୋଗ ତ ମଧୁମେହ

ଦରିଦ୍ର ହୁଏ ଧନକୁ ଅତି

ଯେ କରେ ଅପବ୍ଯୟ ।

ଅତି ଚତୁର ଯୋଗୁଁ କାଉଟି

ମନ୍ଦ ଜିନିଷ ଖାଏ

ଅତି ଲୋଭରୁ ଲୋଭୀ ଲୋକର

ମୃତ୍ୟୁ ନିଶ୍ଚିତ ହୁଏ ।

ଅତି ଲିପିଲେ କାଦୁଅ କାନ୍ଥ

ଯାଏରେ ପୁଣି ଫାଟି

ଅତି ଗରବୁ ସୁବର୍ଣ୍ଣ ଲଙ୍କା

ହୋଇଲା ଦିନେ ମାଟି ।

ଅତି ଭକତି ଚୋର ଲକ୍ଷଣ

ବିବିଧ ଶାସ୍ତ୍ର କହେ

ଅତି ଗେହ୍ଲାରେ ପିଲା ପାଳିଲେ

ଅମଣିଷ ସେ ହୁଏ ।

ଅତି ରାଗିବା ଶରୀର ପାଇଁ

ଅଟେ ବହୁତ କ୍ଷତି

ଅତିଠୁ ଦୂରେ ରୁହ ସଭିଏଁ

ଅତିରୁ ସୃଷ୍ଟି ଇତି |