ଅସ୍ଥିର ଭାବନା

ସ୍ଥିର ରଖ ମନ ସର୍ବଦା ସବୁ କାଳରେ ଧନ

ସ୍ଥିର ହୃଦୟେ ତୁ ପାଇବୁ ହରିଙ୍କର ଦର୍ଶନ ।

ଭକ୍ତି ଜ୍ଞାନ ବୈରାଗ୍ୟ ମୂଳ ମନରେ ହେତୁ କର

ଅତି ସହଜ ଭକ୍ତି ଯୋଗ ଆଗେ ମନରେ ଧର।

ଭକତି କର ତୁ ହରିଙ୍କି ସ୍ଥିର ହେବ ଭାବନା

ନିଶ୍ଚୟ ଦୂର ହେବ ତୋର ଯା ଅସ୍ଥିର ଭାବନା ।

ଭକତି ଭାବରେ ବଶ ହୋଇବେ ଶ୍ରୀଭଗବାନ

ସହଜ ସରଳ ଭକତି ଯୋଗ ହେଜ ତୁ ମନ।

ଭକତି ଯୋଗରେ ଜ୍ଞାନ ତୋହର ହେବ ଉଦୟ

ଅନ୍ଧକାର ଦୂର ହୋଇବ ତୁଟିଯିବ ସଂଶୟ ।

ଜ୍ଞାନରୁ ବୈରାଗ୍ୟ ଉଦୟ ନିଶ୍ଚେ ହୋଇବ ତୋର

ସଂସାର ବାସନା ତୁଟିଲେ ଯିବ ଜଞ୍ଜାଳ ଘୋର।

ବାସନା ନିବୃତ୍ତ ହୋଇଲେ ସ୍ଥିର ହେବ ଭାବନା

ଅସ୍ଥିର ଭାବନା ନ ଥିବ ମନ ବୁଝୁଛୁ କି ନା ।

ଧନ ମୋର ବୋଲ ମାନିବୁ କହେ ମନ ରାଜନ

ତତେ ବୁଝାଇ ମୁଁ କହୁଛି ନୁହ ଅସ୍ଥିର ମନ ।

ଶ୍ରୀକୃଷ୍ଣ କହିଲେ ଉଦ୍ଧବ କେତେ ମତେ ପଚାରୁ

ସ୍ଥିର ଭାବନା ଅଟେ ମୋର ମନ ମୋହର ଗୁରୁ ।

ମନ ନିରିମଳ ହୁଅ ତୁ ସ୍ଥିର ହେଉ ଭାବନା

ଗଙ୍ଗାଜଳ ସଦୃଶ ସ୍ବଚ୍ଛ ହେଉ ମୋର ଭାବନା।

ଅସ୍ଥିର ଭାବନା ନ ଆସୁ କେବେ ମନେ ମୋହର

ହରିଙ୍କର ପାଶେ ବିନତି ଶୁଣ କଳା ଠାକୁର ।