ଅପୂର୍ଣ୍ଣ

ଅନ୍ତରଟା ନ ହସିଲେ

    ଓଠେ ହସ ଲାଗେ ଫିକା ଫିକା,

ଆତ୍ମୀୟତା ନ ମିଳିଲେ

     ସମ୍ପର୍କଟା ଲାଗେ ଗୋଟେ ଧୋକା। 

ସବୁଜିମା ନ ରହିଲେ

      ଶୋଭାହୀନ ଦିଶେ ବନ ଭୂଇଁ,

ନୀଳ ବୀଚିମାଳା ବିନା

      ସାଗରଟା ଶୋଭା ପାଏ ନାହିଁ। 

ସୀମନ୍ତଟା ଲାଗେ ଫାଙ୍କା

       ନ ଲାଗିଲେ ସେଥିରେ ସିନ୍ଦୂର,

ସୀମାନ୍ତ ପ୍ରହରୀ ବିନା

        ସୀମାନ୍ତଟା ଦିଶେ ଅସୁନ୍ଦର। 

ଗଛଟା ଲାଗେ ଅଧୁରା

        ନ ହସିଲେ ଫୁଲ ଫଳ ଭାରେ,

ନାରୀ ଲାଗଇ ଅପୂର୍ଣ୍ଣ

        ମାତୃତ୍ଵର ବିନା ପରଶରେ।

ସମଦରଶୀ ନହେଲେ

        ପାଣ୍ଡିତ୍ୟଟା ଲାଗେନାହିଁ ପୂର୍ଣ୍ଣ,

ଦୁଃଖୀ ଦୁଃଖ ନ ବୁଝିଲେ

         ଧନୀ ଲାଗେ ଯେସନେ ନିର୍ଦ୍ଧନ। 

ମଣିଷ ଜନମ ପାଇ

         ନ ରହିଲେ ପର ଉପକାରେ,

କିଶୁଂକ ପୁଷ୍ପ ପରାୟେ

         ବାସ ହୀନ ଜୀବନ ମହୀରେ। 

ମାଟି ମାଆ ସେବା ବିନା

         ଜନମଟା ହୁଏନାହିଁ ପୂର୍ଣ୍ଣ,

ପୂର୍ଣ୍ଣ ଭଳି ଲାଗିଲେବି

          ବାସ୍ତବରେ କିଛିଟା ଅପୂର୍ଣ୍ଣ