ଅପରୂପା ରାଧିକା

ଅଳତା ବୋଳା ପାଦେ ନୂପୁର 

   ଭଜେ କୃଷ୍ଣ ନାମ ସୁର  

ସୁ'ମଧୁର ସେଇ ସ୍ବରେ ବିମୋହିତ 

   ହେଲେ ଜଗତ ଈଶ୍ବର ।

ରସିକ ରାଜଙ୍କ ରସିକ ପଣକୁ 

 ଶୋଭା ବଢାଅନ୍ତି ସେ ରାଧାରାଣୀ  

ଆନମନା ମତି ତିଆରୁଛି ଭିତ୍ତି 

 ସାଜସଜ୍ଜା କହେ ଅକୁହା କହାଣୀ ।

କୋଇଲିର ତାନ ମଳିନ ପଡିଛି 

   ରାଧା ନିରବତା ସୁରେ 

ଫଗୁଣ ମଳୟ ବିରହେ ମରନ୍ତି 

    ବସନ୍ତ ରାଜ ନଅରେ ।

କ୍ଷୀଣ କଟୀ ସଜ ସତେ ଲତା ରାଜ 

   ଆଳସ୍ୟେ ଶୋଇଚି ଚେଇଁ 

ଝୀନ ବସ୍ତ୍ର କାନି ଲୋଟେ ଧରଣୀରେ 

   ଭାବେ ବିମୋହିତ ହେଇ ।

ବଣମଲ୍ଲୀ ଆଜି କୃତ କୃତ ହୁଏ 

 ଗଭାର ସଜରେ ପାପକୁ ଖଣ୍ଡି

ବାଦଲର ଗର୍ବ ଖଣ୍ଡିତ ହେଇଛି 

 ରାଧା କେଶ ରଙ୍ଗେ ହୋଇଛି ମଣ୍ଡି ।

ଅପରୂପ ଶୋଭା ସମ୍ଭାର ଲାଗିଛି 

  ଜଗତ ଠାକୁର ଝୁରନ୍ତି ରାଧା

ଭଗବାନ ପରା କଲେ ପଦ ସେବା 

 ଆମେ କି ଛାର ତା ଉପମା ଦେବା !